پنجاب میں بلدیاتی آرڈیننس الیکشن کمیشن کے سپرد

پنجاب میں نیا بلدیاتی آرڈیننس اور دیگر مواد الیکشن کمیشن کے حوالے کردیا گیا۔

حکومت پنجاب کے ذرائع کا کہنا ہے کہ حکومت نے اپنا کام کرلیا اب الیکشن کمیشن کام شروع کرے، 31 دسمبر کو بلدیاتی اداروں کی مدت ختم ہو رہی ہے۔

دوسری جانب الیکشن کمیشن کا کہنا ہے کہ ای وی ایم کا فیصلہ ہوگیا تو بلدیاتی انتخابات مارچ یا اپریل میں کرانے کیلئے تیار ہیں۔

گزشتہ ہفتے پنجاب کابینہ نے لوکل گورنمنٹ ترمیمی آرڈیننس 2021 کی منظوری دی تھی اور بلدیاتی انتخابات الیکٹرونک ووٹنگ مشین کے ذریعے کرانے کا فیصلہ کیا گیا تھا۔

نئے بلدیاتی ایکٹ کے تحت الیکشن جماعتی بنیادوں پر ہوں گے، پنجاب میں 11 میٹروپولیٹن کارپوریشنز ہوں گی، صوبے کے 9 ڈویژنل ہیڈکوارٹرز کے علاوہ گجرات اور سیالکوٹ کو میٹروپولیٹن کا درجہ حاصل ہوگا۔

اس موقع پر وزیراعلیٰ پنجاب عثمان بزدار کا کہنا تھا کہ نئے بلدیاتی نظام کو مشاورت کے ساتھ حتمی شکل دی گئی ہے، نیابلدیاتی نظام صوبے کے عوام کو حقیقی معنوں میں بااختیار بنائے گا۔

بشکریہ جنگ