پنجاب حکومت کا جاں بحق خاتون رپورٹر کے اہلخانہ کو 25 لاکھ دینے کا اعلان

پنجاب حکومت نے جاں بحق خاتون رپورٹر صدف نعیم کے اہلخانہ کو 25 لاکھ روپے دینے کا اعلان کردیا۔ 

ترجمان پنجاب حکومت مسرت جمشید چیمہ نے لاہور سے جاری بیان میں کہا کہ وزیراعلیٰ پرویز الہٰی نے صدف نعیم کے اہلخانہ کے لیے 25 لاکھ روپے کا اعلان کیا ہے۔

ترجمان پنجاب حکومت نے مزید کہا کہ محکمہ ڈی جی پی آر کی طرف سے بھی صدف نعیم کے اہلخانہ کو 10 لاکھ روپے دیے جائیں گے۔

مسرت جمشید چیمہ نے یہ بھی کہا کہ پنجاب حکومت مرحومہ کے بچوں کی کفالت اور تعلیمی اخراجات برداشت کرے گی۔

ان کا کہنا تھا کہ سابق وزیراعظم عمران خان اور وزیراعلیٰ پنجاب چوہدری پرویز الہٰی نے پی ٹی آئی کے لانگ مارچ کے دوران عمران خان کے کنیٹنر کے نیچے آکر خاتون رپورٹر کے جاں بحق ہونے پر گہرے دکھ کا اظہار کیا ہے۔

ترجمان پنجاب حکومت نے کہا کہ پنجاب حکومت اور تحریک انصاف دکھ کی گھڑی میں صدف نعیم کی فیملی کے ساتھ کھڑے ہیں۔

بشکریہ جنگ