پشاور زلمی کا اسلام آباد یونائیٹڈ کو جیت کیلئے 157 رنز کا ہدف

ایچ بی ایل پی ایس ایل 8 کے 12ویں میچ میں پشاور زلمی نے اسلام آباد یونائیٹڈ کو جیت کے لیے 157 رنز کا ہدف دے دیا۔ 

نیشنل اسٹیڈیم کرکٹ ایرینا میں کھیلے جارہے اس میچ میں اسلام آباد یونائیٹڈ نے ٹاس جیت کر پشاور زلمی کو پہلے بیٹنگ کی دعوت دے دی۔

زلمی کا آغاز شاندار رہا جہاں اس کے اوپنرز محمد حارث اور بابر اعظم نے دھواں دار آغاز فراہم کیا اور پاور پلے کے اختتام پر بغیر کوئی وکٹ گنوائے 69 رنز بنالیے۔

اس کے بعد اسلام آباد یونائیٹڈ نے شاندار کم بیک کرتے ہوئے یکے بعد دیگرے وکٹیں لے کر پشاور زلمی کے اسپیڈ کو بریک لگادی۔

زلمی کی ٹیم 12ویں اوور میں 99 رنز پر 5 وکٹوں سے محروم ہوگئی جس کے بعد یونائیٹڈ نے زلمی کو کھل کر نہ کھیلنے دیا۔ 

پشاور زلمی کی ٹیم مقررہ 20 اوورز میں 8 وکٹوں کے نقصان پر 156 رنز بناسکی۔ 

بابر اعظم نے 75 رنز کی ناقابلِ شکست اننگز کھیلی جبکہ محمد حارث 40 رنز کے ساتھ دوسرے نمایاں بلے باز ہیں۔ 

داسن شناکا 11 رنز بناسکے جبکہ ان کے علاوہ کوئی بھی کھلاڑی ڈبل فیگر میں داخل نہیں ہوسکا۔ 

اسلام آباد یونائیٹڈ کی جانب سے حسن علی نے 3 وکٹیں لیں جبکہ رومان رئیس، شاداب خان، فہیم اشرف اور مبصر خان نے ایک ایک وکٹ لی۔

پشاور زلمی کا ایونٹ میں یہ چوتھا میچ ہے، اس سے قبل اسے تین میچوں میں دو میں کامیابی ملی جبکہ ایک میں شکست کا سامنا کرنا پڑا۔ 

اسلام آباد یونائیٹڈ کی ٹیم اپنا تیسرا میچ کھیل رہی ہے جبکہ اسے دو میچز میں سے ایک میں کامیابی ملی اور ایک مرتبہ شکست کا منہ دیکھنا پڑا۔

پشاور زلمی کی ٹیم کی قیادت بابر اعظم کر رہے ہیں جبکہ دیگر کھلاڑیوں میں محمد حارث، صائم ایوب، ٹام کوہلر کیڈمور، روومین پاول، دشن شناکا، جمی نیشم، وہاب ریاض، عثمان قادر، ارشد اقبال اور سفیان مقیم شامل ہیں۔ 

اسلام آباد یونائیٹڈ کی کپتانی شاداب خان کر رہے ہیں جبکہ دیگر کھلاڑیوں میں کولن منرو، رحمان اللّٰہ گرباز، ریسی ونڈر ڈسن، اعظم خان، آصف علی، مبصر خان، فہیم اشرف، ٹام کرن، حسن علی اور رومان رئیس شامل ہیں۔

بشکریہ جنگ