پرویز الہٰی کے بیٹے راسخ الہٰی ایف آئی اے میں پیش، جوابات جمع کروادیے

وزیراعلیٰ پنجاب چوہدری پرویز الہٰی کے بیٹے راسخ الہٰی وفاقی تحقیقاتی ادارے (ایف آئی اے) کے دفتر میں پیش ہوگئے۔ 

ذرائع کا کہنا ہے کہ راسخ الہٰی نے ایف آئی اے کے نوٹس پر جوابات جمع کروادیے۔

ذرائع ایف آئی اے نے بتایا کہ راسخ الہٰی تقریباً ڈیڑھ گھنٹے ایف ائی اے آفس میں موجود رہے۔

میڈیا سے غیر رسمی گفتگو کے دوران چوہدری راسخ الہٰی کا کہنا تھا کہ ایف آئی اے کو ریکارڈ جمع کروادیا ہے، ایف آئی اے مزید تفصیلات مانگے تو وہ بھی فراہم کریں گے۔

ایف آئی اے ذرائع کا کہنا ہے کہ راسخ الہٰی کو ایک سوالنامہ بھی دیا گیا ہے، راسخ الہٰی جوابات اپنے وکیل کے ذریعے یا خود بھی جمع کرواسکتے ہیں۔

خیال رہے کہ ایف آئی اے نے راسخ الہٰی، ان کی اہلیہ اور مونس الہٰی کی اہلیہ کو طلب کیا تھا۔ 

ذرائع نے بتایا تھا کہ چوہدری خاندان کے ان افراد کو منی لانڈرنگ کیس میں آج صبح 11 بجے وفاقی تحقیقاتی ادارے کی جانب سے بلایا گیا تھا۔

ایف آئی اے نے رقوم کی بیرونِ ملک منتقلی، غیر ملکی سفر کی معلومات اور دستاویز بھی طلب کی تھیں۔

بشکریہ جنگ