پرویز الہٰی اعتماد کا ووٹ لیں یا نہ لیں وزیر اعلیٰ نہیں رہیں گے، حافظ حمد اللّٰہ

پاکستان ڈیموکریٹک موومنٹ (پی ڈی ایم) کے ترجمان حافظ حمد اللّٰہ کا کہنا ہے کہ پرویز الہٰی اعتماد کا ووٹ لیں یا نہ لیں دونوں صورتوں میں وزیر اعلیٰ نہیں رہیں گے۔

سماجی رابطے کی ویب سائٹ ٹوئٹر پر جاری کیے گئے سلسلہ وار ٹوئٹس میں حافظ حمد اللّٰہ نے کہا کہ عمران خان کی 9 جنوری کو اعتماد کا ووٹ لینا صرف خبر کی خبر رہے گی۔

انہوں نے کہا کہ شنید ہے کہ عمران خان نے جڑواں شہر کے مکین سے ملنے کی کوشش کی، مگر وہاں سے نمبر بند یا مصروف ملا، اب خان صاحب کے لیے کال نہیں آئے گی۔

پنجاب کے وزیرِ اعلیٰ چوہدری پرویز الہٰی کو ایوان سے اعتماد کا ووٹ لینے کے چیلنج کا سامنا ہے۔

ترجمان پی ڈی ایم کا کہنا ہے کہ پنجاب حکومت کی فرانزک رپورٹ سے ثابت ہوا کہ خان صاحب کو ایک گولی بھی نہیں لگی، رپورٹ سے ان کا ایک اور جھوٹ پکڑا گیا، بیانیہ ایک بار پھر جھوٹا نکلا۔

ان کا یہ بھی کہنا ہے کہ قانون میں فواد چوہدری کی پریس کانفرنس نہیں  بلکہ پنجاب فرانزک رپورٹ قابل قبول ہے۔

بشکریہ جنگ