پاک نیوزی لینڈ میچ کے نتیجے کے بعد سارو گنگولی کا یوٹرن
ورلڈ کپ کے 35 ویں اور اہم ترین میچ میں فخر زمان کی طوفانی اننگز کی بدولت پاکستان کے شاندار کم بیک کے بعد سابق بھارتی کپتان سارو گنگولی ایونٹ کے سیمی فائنل میں پاک بھارت ٹاکرا ہوتا دیکھنے کے لیے پُرامید ہیں۔
سارو گنگولی نے ورلڈ کپ میں بھارت کے ہاتھوں پاکستان کی شکست ہونے کے بعد پاکستان کے لیے ٹورنامنٹ میں کم بیک کرنا مشکل قرار دے دیا تھا۔
اُنہوں نے کہا تھا کہ پاکستان کا ایونٹ میں کم بیک کرنا مشکل ہے کیونکہ ابھی گرین شرٹس میں جذبے کی کمی نظر آ رہی ہے جبکہ بھارتی ٹیم پاکستان سے بہت آگے ہے۔
تاہم گزشتہ روز نیوزی لینڈ کے خلاف پاکستان کا ورلڈ کپ میں شاندار کم بیک دیکھ کر وہ یوٹرن لینے پر مجبور ہوگئے۔
اب سابق بھارتی کپتان کولکتہ کے ایڈن گارڈن میں پاکستان اور بھارت کو سیمی فائنل میں آمنے سامنے دیکھنے کی امید کرنے لگے ہیں۔
واضح رہے کہ بھارت میں جاری آئی سی سی ورلڈ کپ کے سیمی فائنل میں بھارت اور جنوبی افریقہ کوالیفائی کرچُکی ہیں، آسٹریلیا پوائنٹس ٹیبل پر تیسری پوزیشن پر موجود ہے۔
یاد رہے کہ گزشتہ روز نیوزی لینڈ کے خلاف میچ میں پاکستان کی کامیابی کے بعد قومی ٹیم کا رن ریٹ بہتر ہوکر مثبت ہوگیا ہے۔
اب پاکستان کی سیمی فائنل میں پہنچنے کی امیدیں مزید بڑھ گئی ہیں۔
Comments are closed.