پاک بھارت کرکٹرز کے خوشگوار تعلقات بڑھنے لگے

پاکستانی اور بھارتی کرکٹرز کے میدان سے باہر خوشگوار تعلقات بڑھنے لگے۔

بھارتی کرکٹ کے مایہ ناز بیٹر اور سابق کپتان ویرات کوہلی نے دبئی میں پاکستان کے خلاف ہائی وولٹیج میچ کے بعد اپنی دستخط شدہ شرٹ فاسٹ بولر حارث رؤف کو دی۔

بھارتی کرکٹ بورڈ (بی سی سی آئی) نے سماجی رابطے کی ویب سائٹ پر ویرات کوہلی اور حارث رؤف کے درمیان پیش آئے اس لمحے کی ویڈیو شیئر کی۔

بی سی سی آئی نے ویڈیو اس کیپشن کے ساتھ شیئر کی کہ میچ ختم ہوسکتا ہے لیکن اس طرح کے لمحات چمکتے رہتے ہیں، ویرات کوہلی نے دل کو گرما دیا، انہوں نے پاکستان سے میچ کے بعد حارث رؤف کو اپنی دستخط شدہ جرسی دی۔

متحدہ عرب امارات (یو اے ای) میں جاری ایشیا کپ کے دوران پاکستان اور بھارت کے کرکٹرز کی ملاقاتوں اور خوش گپیوں کا سلسلہ جاری ہے۔

ویرات کوہلی اور دیگر بھارتی کھلاڑیوں نے آئی سی سی اکیڈمی گراؤنڈ میں پاکستان کے انجرڈ فاسٹ بولر شاہین شاہ آفریدی کی خیریت دریافت کی تھی۔

بھارتی کپتان روہیت شرما اور بابر اعظم کے درمیان بھی خوش گپیاں ہوئیں جبکہ ویرات کوہلی نے بھی پاکستانی کپتان سے ملاقات کی۔

بشکریہ جنگ