پاکستان کیخلاف ون ڈے سیریز کے لیے افغان ٹیم کی ٹریننگ

پاکستان کے خلاف شیڈول ون ڈے سیریز کے لیے افغانستان کی کرکٹ ٹیم کے کھلاڑیوں نے کابل میں ٹریننگ شروع کر دی، جبکہ پاکستان کرکٹ بورڈ نے بھی تین میچز کی سیریز کی تیاری کے لیے 21 سے 28 اگست تک لاہور میں کمیپ لگانے کا فیصلہ کیا ہے۔

پاکستان اور افغانستان کے درمیان تین ون ڈے میچز کی سیریز ستمبر کے پہلے عشرے میں شیڈول ہے، افغانستان کی میزبانی میں سیریز سری لنکا کے شہر ہمبنٹوٹا میں کھیلی جائے گی۔

اس سیریز کی تیاری کے لیے افغانستان کرکٹ ٹیم کا ٹریننگ سیشن جاری ہے، کھلاڑی کابل میں بھرپور ٹریننگ میں مصروف ہیں، افغان کرکٹ بورڈ کے مطابق ٹریننگ کیمپ کا آخری مرحلہ شروع ہوگیا ہے اور پاکستان کے خلاف سیریز کے لیے جلد ٹیم سری لنکا روانہ ہو گی۔

دوسری جانب پاکستان کرکٹ بورڈ نے بھی ون ڈے ٹیم کا کیمپ 21 سے 28 اگست تک لاہور میں لگانے کا فیصلہ کیا ہے۔

ذرائع کے مطابق کیمپ میں رپورٹ کرنے پر کھلاڑیوں کی کورونا وائرس ٹیسٹنگ ہوگی، البتہ پی سی بی کو افغانستان کی جانب سے سیریز کے حتمی شیڈول کے اعلان کا انتظار ہے۔ اعلان کے بعد ہی پاکستان ٹیم کی روانگی کا فیصلہ ہوگا۔

بشکریہ جنگ