پاکستان میں ہیلتھ ورکرز کورونا وائرس کے باعث موت کا شکار

اسلام آباد کے پمزاسپتال کے سابق چیف فارماسسٹ ڈاکٹر جاوید اقبال کورونا وائرس کے سبب انتقال کرگئے جبکہ مانسہرہ میں بھی وبا سے لیڈی ڈاکٹر جان کی بازی ہارگئیں۔

ترجمان پمز اسپتال اسلام آباد ڈاکٹر وسیم خواجہ کے مطابق ڈاکٹر جاوید اقبال کئی روز سے کورونا وائرس کے باعث بیمار تھے جبکہ وزارتِ صحت کے مطابق  پمز سمیت اسلام آباد میں 350 سے زائد ہیلتھ ورکر کورونا وائرس سے متاثر ہو چکے ہیں۔

 ڈاکٹر وسیم خواجہ نے کہا کہ اب تک پمز اسپتال کے 4 ہیلتھ ورکرز کورونا وائرس سے موت کا شکار ہوچکے ہیں جبکہ پچھلے ماہ پمز اسپتال کے شعبہ چلڈرن کے ڈائریکٹر ڈاکٹر منظور بھی  شدید علالت کے بعد انتقال کرگئے تھے۔

دوسری جانب مانسہرہ میں بھی  کورونا وائرس سے بیمار لیڈی ڈاکٹر انیلا جان کی بازی ہارگئیں۔

صدر ڈاکٹرز ایسوسی ایشن کا کہنا تھا کہ لیڈی ڈاکٹر انیلا دو ہفتوں سے مانسہرہ کے نجی اسپتال میں زیرِعلاج تھیں اور آج صبح موت کا شکار ہوگئیں۔

واضح رہے نیشنل کمانڈ اینڈ کنٹرول سینٹر (این سی او سی) کے اعداد و شمار کے مطابق پاکستان میں گزشتہ 24 گھنٹوں کے دوران کورونا وائرس کے مزید 1 ہزار 346 کیسز سامنے آئے ہیں، مزید 53 افراد اس موذی وباء کے سامنے زندگی کی بازی ہار گئے جبکہ اس بیماری سے 1 ہزار 542 مریض شفایاب ہو گئے۔

ملک بھر میں کورونا وائرس سے انتقال کرنے والوں کی مجموعی تعداد 11 ہزار 967 ہو گئی ہے، جبکہ کُل مریضوں کی تعداد 5 لاکھ 54 ہزار 474 ہو چکی ہے۔

The post پاکستان میں ہیلتھ ورکرز کورونا وائرس کے باعث موت کا شکار appeared first on Urdu News – Today News – Daily Jasarat News.

بشکریہ جسارت