ٹی 20 ورلڈ کپ کا میگا میچ بارش میں بہہ گیا

ٹی ٹوئنٹی ورلڈ کپ میں گروپ ون کا سب سے بڑا میچ ’آسٹریلیا بمقابلہ انگلینڈ‘ بارش میں بہہ گیا تو افغانستان اور آئرلینڈز کا میچ بھی بارش کے باعث منسوخ کرنا پڑا۔

آج ایونٹ کے دونوں میچز متاثر ہونے کے بعد چاروں ٹیموں کو بغیر کھیلے ہی ایک ایک پوائنٹ مل گیا۔

میلبرن میں بارش نے میگا ایونٹ کا مزہ کرکرہ کر دیا، گروپ ون کی 2 بڑی ٹیموں دفاعی چیمپئن آسٹریلیا اور ون ڈے کی عالمی چیمپین انگلینڈ کے درمیان میچ میلبرن میں ہونا تھا۔

لیکن بارش نے ایسا نہ ہونے دیا، میچ میں ایک گیند بھی پھینکنے کی مہلت نہ ملی اور دونوں ٹیموں کو ایک ایک پوائنٹ ایوارڈ کر دیا گیا۔

اس سے پہلے گروپ ون ہی میں شامل آئرلینڈ اور افغانستان کے درمیان میچ بھی بارش کے باعث نہ ہو سکا، افغان ٹیم زیادہ بد قسمت رہی کہ سپر 12 میں اس کا یہ دوسرا میچ بارش کی نذر ہوا ہے۔

اس وقت گروپ ون میں ٹیموں کی پوزیشن کچھ اس طرح ہے۔ نیوزی لینڈ 2 میچز میں 3 پوائنٹس کے ساتھ پہلے نمبر پر ہے، انگلینڈ، آئرلینڈ اور آسٹریلیا کے 3، 3 میچز میں 3، 3 پوائنٹس ہیں جبکہ سری لنکا اور افغانستان کے 2، 2 پوائنٹس ہیں۔

دوسری جانب گروپ ٹو میں بھارت اپنے دونوں میچز جیت کر پہلے نمبر پر ہے، جنوبی افریقہ کی دوسری پوزیشن ہے، پاکستان اب تک کوئی پوائنٹ حاصل نہیں کر سکا ہے۔

بشکریہ جنگ