وزیر اعظم عمران خان کی جامعات میں بہتری کےلیے حکمت عملی بنانے کی ہدایت

وزیراعظم  عمران خان نے جامعات میں انتظامی عہدوں پر تجربہ کار عہدیداروں کی تعیناتی اور جامعات کےسربراہوں کی کارکردگی میں نمایاں بہتری کے لیے حکمت عملی مرتب کرنے کی ہدایت کردی۔

عمران خان نے کہا کہ جامعات میں اعلیٰ تعلیمی ماحول کی فراہمی اور انتظامی امور میں نمایاں بہتری لائی جائے۔

 خیبر پختونخوا اور پنجاب کی جامعات کےانتظامی امور، تدریسی عمل کے معیار کا جائزہ لیا گیا۔

 اجلاس میں مالی امور میں شفافیت، میرٹ پر عملدر آمد کے حوالے سے بھی گفتگو کی گئی، جبکہ ڈاکٹر عطاء الرحمن نے اجلاس میں ویڈیو لنک کے ذریعے شرکت کی۔

اجلاس میں جامعات کے تنظیمی امور، مالی مسائل، طلبا کے تدریسی عمل میں معیار پر بریفنگ دی گئی، جبکہ جامعات میں تجربہ کار سربراہوں کی تعیناتی کے حوالے سے مختلف تجاویز بھی پیش کی گئیں۔

عمران خان نے کہا کہ  ملک کی جامعات سے ملک کا مستقبل وابستہ ہے، معیاری تدریسی عمل کا تسلسل اور طلبا کو سہولتوں  کی فراہمی کو یقینی بنایا جائے۔

بشکریہ جنگ