وزیر اعظم عمران خان استعفیٰ دے سکتے ہیں، بھارتی میڈیا کا دعویٰ

 بھارتی میڈیا نے دعویٰ کیا ہے کہ وزیر اعظم عمران خان استعفیٰ دے سکتے ہیں۔

دوسری جانب کابینہ کے ایک وزیر  نے جیونیوز سے گفتگو کرتے ہوئے بھارتی میڈیا کی خبروں کی تردید کی ہے۔

اس سے قبل عمران خان کے لیے سابق وزیراعظم کی سیکیورٹی کے انتظامات کی تیاریاں شروع کردی گئیں۔

ذرائع کے مطابق وزیراعظم عمران خان کے پرنسپل سیکریٹری اعظم خان نے سیکریٹری داخلہ کو اس حوالے سے خط لکھ دیا ہے۔

ذرائع کے مطابق خط میں کہا کہ عمران خان کے سابق وزیراعظم کے طور پر سیکیورٹی کا انتظام کیا جائے اور اس حوالے سے مجوزہ طریقہ کار کے تحت انتظامات عمل میں لایا جائے۔

ذرائع کے مطابق سیکریٹری داخلہ نے خط ایڈیشنل سیکریٹری داخلہ کو ضروری کارروائی کے لیے مارک کردیا ہے اور استفسار کیا کہ سابق وزیراعظم کو کونسی سیکیورٹی ملتی ہے؟ آگاہ کیا جائے۔

ذرائع کے مطابق سیکریٹری داخلہ نے یہ بھی استفسار کیا کہ وزارت عظمیٰ سے الگ ہونے کے بعد سیکیورٹی کی نوعیت کیا ہوگی؟ اس حوالے سے مکمل سیکیورٹی جائزہ رپورٹ فراہم کی جائے۔

بشکریہ جنگ