وزیر اعظم آفس کا وائٹ ہاؤس کے بیان کا خیر مقدم

وزیر اعظم آفس نے وزیر اعظم شہباز شریف کے ذمہ داریاں سنبھالنے پر وائٹ ہاؤس کے بیان کا خیر مقدم کیا ہے۔

وزیر اعظم آفس سے جاری ایک بیان میں کہا گیا ہے کہ پاکستان سے امریکا کے طویل مدتی تعلقات کی تجدید نو کا خیرمقدم کرتے ہیں۔

ترجمان حکومت پاکستان نے کہا کہ ہماری نئی حکومت امریکا کیساتھ تعمیری اور مثبت روابط کو فروغ دینا چاہتی ہے۔

ترجمان کا یہ بھی کہنا تھا کہ خطے میں امن، سیکیورٹی اور ترقی کے فروغ کیلئے امریکا کیساتھ مثبت روابط کو فروغ دینا چاہتے ہیں۔

انہوں نے کہا کہ ہم مساوات، باہمی مفاد اور فائدے کے اصولوں پر اہم تعلقات کو مزید فروغ دینے کے منتظر ہیں۔

وائٹ ہائوس ترجمان کا کہنا ہے کہ پاکستانی قیادت سے مضبوط تعلقات رہیں گے۔

خیال رہے کہ وائٹ ہائوس ترجمان کا کہنا تھا کہ پاکستانی قیادت سے مضبوط تعلقات رہیں گے، دونوں ممالک مسلسل رابطوں میں ہیں، پھلتا پھولتا پاکستان امریکا کے مفاد میں ہے، انہیں پاکستان کے داخلی امور پر رائے کا حق نہیں ہے۔

ترجمان نے مزید کہا کہ امریکی صدر جوبائڈن کی جانب سے پاکستان کے نومنتخب وزیراعظم شہباز شریف کو کب فون کیا جائے گا، اس بارے میں ابھی کچھ نہیں کہا جاسکتا۔

بشکریہ جنگ