وزیراعلیٰ پنجاب کی قائداعظم کے مجسمے پر فوری طور پر عینک لگانے کی ہدایت

وزیراعلیٰ پنجاب سردار  عثمان بزدار نے وہاڑی میں قائد اعظم محمد علی جناح کے مجسمے سے چوری ہونے والی عینک کا نوٹس لیتے ہوئے فوری طور پر مجسمے پر چشمہ لگانے کی ہدایت کردی۔

وزیر اعلیٰ پنجاب عثمان بزدار نے وہاڑی میں قائد اعظم کے مجسمے سے عینک چوری ہونے کے واقعہ کا نوٹس لیتے ہوئے کمشنر ملتان سے رپورٹ طلب کرلی۔

پولیس کا کہنا ہے کہ واقعہ گذشتہ شب پیش آیا، ڈپٹی کمشنر کے دفتر میں نصب کیمروں کی مدد سے چوروں کی تلاش شروع کردی ہے۔

عثمان بزدار نے کہا کہ قائداعظم جیسی عظیم ہستی کے مجسمے سے چشمہ  چوری کرنا انتہائی افسوسناک فعل ہے۔

وزیراعلیٰ پنجاب نے واقعہ میں ملوث عناصر کے خلاف قانونی کارروائی کا حکم دے دیا۔

واضح رہے کہ وہاڑی میں نامعلوم چوروں نے بابائے قوم قائدِاعظم محمد علی جناح کے مجسمے سے عینک چوری کرلی تھی۔

ضلعی انتظامیہ کا کہنا تھا کہ قائدِاعظم کا مجسمہ ڈپٹی کمشنر کمپلیکس میں نصب ہے، قائد اعظم محمد علی جناح کے مجسمے سے نامعلوم چوروں نے عینک چوری کرلی۔

پولیس کا کہنا تھا کہ واقعہ گذشتہ شب پیش آیا، ڈپٹی کمشنر کے دفتر میں نصب کیمروں کی مدد سے چوروں کی تلاش شروع کردی گئی ہے۔

بشکریہ جنگ