وزیراعظم کی سعودی سرمایہ کاروں کو پاکستان میں سرمایہ کاری کی دعوت

وزیراعظم شہباز شریف نے سعودی سرمایہ کاروں کو پاکستان میں سرمایہ کاری کرنے کی دعوت دے دی۔

وزیراعظم شہباز شریف سے سعودی عرب سے تعلق رکھنے والے کاروباری شخصیات اور سرمایہ کاروں کے ایک وفد نے اسلام آباد میں ملاقات کی۔

شہباز شریف نے خطاب کرتے ہوئے کہا کہ پاکستان اور سعودی عرب کے تعلقات پچھلے 75 سالوں میں مثالی رہے ہیں، ماہ مقدس میں سعودی ولی عہد کی جانب سے دورے پر بلایا گیا تھا، دورہ سعودی عرب انتہائی مفید رہا۔

وزیراعظم نے کہا کہ پاکستان میں سرمایہ کاری کے  وسیع مواقع ہیں، تجارت، سرمایہ کاری سمیت مختلف شعبوں میں تعاون بڑھانا چاہتے ہیں۔

شہباز شریف نے کہا کہ سعودی سرمایہ کاروں کو تمام سہولیات فراہم کی جائیں گی، وقت آگیا ہے کہ باہمی تعاون کو معاشی شراکت داری میں تبدیل کیا جائے۔

وزیراعظم نے کہا کہ سعودی عرب نے ہمیشہ ہر شعبے میں پاکستان کا بھرپور ساتھ دیا، سعودی عرب نے مشکل وقت میں تیل کی موخر ادائیگی پر فراہمی اور مالی معاونت کی، سعودی بھائی سرمایہ کاری کے مواقع سے زیادہ سے زیادہ استفادہ کریں، سعودی سرمایہ کار پاکستان کی افرادی قوت سے فائدہ اٹھا سکتے ہیں۔

شہباز شریف نے کہا کہ سعودی ولی عہد نے ملک میں بہت سی موثر اصلاحات متعارف کروائیں، ان اصلاحات سے سعودی عرب ترقی کی نئی منازل طے کر رہا ہے۔

بشکریہ جنگ