وزیراعظم کی زیر صدارت کابینہ اجلاس، 7 نکاتی ایجنڈے پر غور

وزیراعظم شہباز شریف کی زیر صدارت وفاقی کابینہ کا اجلاس جاری ہے،  اجلاس میں 7 نکاتی ایجنڈا زیر غور ہے، جس میں  ملک کی سیاسی و معاشی صورتحال اور انٹرنیشنل مانیٹری فنڈ (آئی ایم ایف) معاہدے کا جائزہ لیا جا رہا ہے۔

ذرائع کا کہنا ہے کہ کابینہ کے اجلاس میں ملک کی سیاسی و معاشی صورتحال پر غور ہوگا، آئی ایم ایف کے ساتھ اسٹینڈ بائی معاہدے پر کابینہ کو اعتماد میں لیا جائے گا۔

کابینہ اجلاس میں 7 نکاتی ایجنڈا زیر غور آئے گا، جس میں قومی اسپورٹس کی 5 سالہ پالیسی پیش ہوگی، اسلام آباد میں کچرے کو ٹھکانے لگانے کا منصوبہ بھی ایجنڈے کا حصہ ہوگا، پاکستان لینڈ پورٹ اتھارٹی سے متعلق قانون سازی کا ڈرافٹ پیش ہوگا۔

پرائیویٹ سیکیورٹی سروسز ریگولیٹر بل کابینہ میں پیش ہوگا، افغانستان کیلئے اسپیئر پارٹس کی شپمنٹ کی نان آبجیکشن سرٹیفکیٹ (این او سی) کا ایجنڈا پیش ہوگا، نیشنل کمیشن آن ہیومن ڈیولپمنٹ آرڈیننس 2002 میں مزید ترمیم پر غور ہوگا اس کے ساتھ ہی وفاقی اردو یونیورسٹی آرڈیننس 2002 میں مزید ترمیم پر غور بھی ہوگا۔

بشکریہ جنگ