وزیراعظم نے ایک آئینی ادارے کی توہین کی، شیری رحمٰن

پیپلز پارٹی کی نو منتخب سینیٹر شیری رحمٰن نے کہا ہے کہ وزیراعظم نے ایک آئینی ادارے کی توہین کی ہے، الیکشن کمیشن پر ’مجرموں کو بچانے‘ اور جمہوریت کو نقصان پہنچانے کے الزام لگائے ہیں، وزیراعظم کی طرف سے اس طرح کے بیانات قابل تشویش ہیں۔

شیری رحمٰن نے اپنے بیان میں کہا کہ وزیراعظم اپنے ارکان کو قابو کریں، اداروں کو متنازع نہ بنائیں،ڈسکہ الیکشن کے بعد حکومت کے پاس الیکشن کمیشن پر انگلی اٹھانے کا اخلاقی جواز نہیں بچا۔

اُنہوں نے کہا کہ وزیراعظم عمران خان کو الیکشن کمیشن کے آئینی ادارے کی توہین زیب نہیں دیتی، حکومت کے سربراہ کی طرف سے توہین آمیز بیانات نہیں آنے چاہئیں۔

وزیرِ اعظم عمران خان کی جانب سے الیکشن کمیشن آف پاکستان پر جمہوریت کو نقصان پہنچانے کے الزام پر کمیشن میں اجلاس ہوا۔

شیری رحمٰن نے یہ بھی کہا کہ ڈسکہ الیکشن کے بعد حکومت کے پاس الیکشن کمیشن پر انگلی اٹھانے کا اخلاقی جواز نہیں، صدر اعتماد کے ووٹ کے لیے اجلاس تب بلاتا ہے جب ایسا لگے کہ وزیراعظم اعتماد کھوچکے ہیں۔

اُنہوں نے مزید کہا کہ وزیراعظم، صدر پاکستان کا اختیار استعمال نہ کریں،  حکومت ملک اور پارلیمان کو آئین کے مطابق چلائے اپنی مرضی کے مطابق نہیں۔

بشکریہ جنگ