وزارت داخلہ نے سیلاب کی ہنگامی صورتحال پر پاک فوج تعیناتی کی منظوری دے دی

وزارت داخلہ نے سیلاب کی ہنگامی صورتحال پر پاک فوج تعیناتی کی منظوری دے دی۔

وزارت داخلہ کا کہنا ہے کہ سویلین حکومت کی مدد کیلئےچاروں صوبوں میں پاک فوج تعینات کرنے کی منظوری دی ہے، آرٹیکل 245 کے تحت فوج تعیناتی کی سمری وفاقی کابینہ کو حتمی منظوری کیلئے بھجوادی گئی۔

محکمہ ایری گیشن کا کہنا ہے کہ سیلابی ریلے اور پانی کے بہاؤ میں مسلسل اضافہ ہو رہا ہے، سیلاب کے باعث ڈیم میں معمولی نقصانات ہوئے ہیں۔

وزارت داخلہ کا کہنا ہے کہ چاروں صوبائی حکومتوں نے سیلاب سے متاثرہ علاقوں میں فوج تعینات کرنے کی ریکوزیشن بھجوائی، جس کے بعد ریلیف اینڈ ریسکیو آپریشنز میں مدد کیلئے پاک افواج کی تعیناتی کی جا رہی ہے۔

 وزیر داخلہ رانا ثناء اللّٰہ نے کہا کہ پاک افواج کو چاروں صوبوں کے سیلاب سے آفت زدہ علاقوں میں تعینات کیا جا رہا ہے، حکومت پنجاب نے ڈی جی خان میں سیلاب سے متاثرہ علاقوں میں پاک فوج تعینات کرنے کی ریکوزیشن دی۔

وزیر داخلہ نے کہا کہ حکومت کے پی نے ڈی آئی خان میں فوج تعیناتی کی ریکوزیشن دی ہے، بلوچستان نے نصیرآباد، جھل مگسی، صحبت پور میں فوج تعیناتی کی ریکوزیشن دی، جبکہ جعفر آباد اور لسبیلہ میں بھی فوج کی تعیناتی کیلئے ریکوزیشن دی گئی ہے۔

 رانا ثناء اللّٰہ نے کہا کہ سندھ حکومت نے سیلابی علاقوں کیلئے فوج تعینات کرنے کی ریکوزیشن بھیجی۔ کنٹرول روم سے سیلاب کی صورتحال کو مسلسل مانیٹر کیا جا رہا ہے، سیلاب سے متاثرہ لوگوں کسی صورت اکیلا نہیں چھوڑیں گے۔

بشکریہ جنگ