وزارتِ عظمیٰ سے استعفے کے بعد بورس جانسن کو دعوت کا مقام تبدیل کرنا پڑ گیا

بورس جانسن اور ان کی اہلیہ کیری نے اپنی شادی کی پہلی سالگرہ کے موقع پر تقریب منعقد کرنے کی تیاری کی تھی جس کا مقام اب تبدیل کیا جا رہا ہے۔

برطانوی وزرائے اعظم کی سرکاری رہائش گاہ لندن میں واقع 10 ڈاؤننگ اسٹریٹ ہوتی ہے لیکن نجی اور سرکاری تقریبات کے لیے وہ ایک علیحدہ گھر استعمال کرتے ہیں جو لندن کے شمال میں واقع ہے۔

سولہویں صدی میں تعمیر کردہ یہ گھر ’’چیکرز‘‘ کہلاتا ہے جہاں برطانیہ کے وزرائے اعظم دیگر ممالک کے رہنماؤں کی میزبانی بھی کرتے ہیں اور اپنی ذاتی تقریبات کے لیے بھی اسے استعمال کرتے ہیں۔

ایک برطانوی اخبار ’’دی مرر‘‘ نے اپنی رپورٹ میں دعویٰ کیا تھا کہ بورس جانسن وزیراعظم کے طور پر چند ہفتے مزید کام جاری رکھنا چاہتے ہیں کیونکہ انہیں چیکرز میں اپنی شادی کی سالگرہ کے لیے دعوت منعقد کرنی ہے۔

بورس جانسن کے ایک ساتھی نے کہا کہ شادی کی سالگرہ اب چیکرز میں نہیں منائی جائے گی۔

یاد رہے کہ بورس جانسن اور کیری کی شادی پچھلے برس ایک سادہ سی تقریب میں ویسٹ منسٹر کیتھڈرل میں ہوئی تھی۔

شادی کی سالگرہ کے لیے تقریب 30 جولائی کو چیکرز میں ترتیب دی گئی تھی۔

بشکریہ جنگ