نیپالی وزیر کو قطار میں کھڑا رکھنے پر نجی سیکیورٹی اہلکار گرفتار

نیپال کے ویزا سینٹر میں وزیر کو قطار میں باری کا انتظار کرنے کی ہدایت دینے پر نجی سیکیورٹی اہلکار کو گرفتار کرلیا گیا۔

جمعہ کو نیپال کے وزیر برائے ثقافت، سیاحت اور سول ایوی ایشن جیون رام اپنے اہلخانہ کے ہمراہ بیرون ملک سفر کیلئے بائیومیٹرک کروانے ویزا سینٹر پہنچے تھے۔

رش کی وجہ سے انہوں نے قطار توڑنے کی کوشش کی تو سیکیورٹی اہلکار نے انہیں قطار میں رہنے کا کہا۔

وزیر کے سرکاری محافظوں نے گارڈ کو بتایا کہ جیون رام وزیر ہیں اس کے باوجود گارڈ نے اصرار کیا کہ ان سے پہلے بھی کئی لوگ آئے ہوئے تھے، وزیر اپنی باری کا انتظار کریں۔

اس موقع پر نیپالی وزیر اور نجی گارڈ کے درمیان تلخ کلامی بھی ہوئی، وزیر نے وزارت داخلہ سے شکایت کی کہ مذکورہ اہلکار کے خلاف کارروائی کی جائے۔

وزارت سیاحت کی طرف سے باقاعدہ درخواست موصول ہونے کے بعد وزارت داخلہ نے پولیس کو گارڈ کے خلاف کارروائی کا حکم دیا جسے گرفتار کرلیا گیا ہے۔

بشکریہ جنگ