برطانیہ کے ایک علاقائی وزیر نے خبردار کیا ہے کہ اگر نیٹو اتحاد نے یوکرین میں نو فلائی زون کا اطلاق کیا تو اس سے ’جوہری جنگ‘ کا آغاز ہو سکتا ہے۔

ویلز کی اسمبلی کے رکن مِک انٹونِو کے والدین یوکرین سے ہیں اور وہ گذشتہ ہفتے یوکرین کے دورے پر بھی گئے ہوئے تھے۔

مِک انٹونِو کا کہنا تھا کہ ان کے خیال میں ’اکثر یوکرینی‘ سمجھتے ہیں کہ اگر برطانوی اور نیٹو کی فوجیں ’براہ راست اس جنگ میں ملوث‘ ہو جاتی ہیں تو یہ خطرے سے خالی نہ ہو گا۔ تاہم بی بی سی بات کرتے ہوئے اُن کا مزید کہنا تھا کہ یوکرین کو دیگر ممالک سے اسلحہ درکار ہے تا کہ اسے ’لڑنے کی صلاحیت‘ حاصل ہو سکے۔

یوکرین کے صدر ولادیمیر زیلنسکی نے مغربی ممالک سے اپیل کی ہے وہ یوکرین میں نو فلائی زون قائم کریں لیکن برطانیہ کے وزیر دفاع نے یہ کہتے ہوئے اس تجویز کو رد کر دیا ہے کہ اس سے جنگ پورے یورپ میں پھیل جائے گی۔

اس سے قبل بدھ کو ہی ایک یوکرینی خاتون نے برطانیہ کے وزیر اعظم سے کہا تھا کہ یوکرینی لوگ مغربی ممالک سے پرزور اپیل کر رہے ہیں کہ یوکرین کی فضائی حدود کا تحفظ کیا جائے اور وہاں نو فلائی زون نافذ کیا جائے۔

یہ بھی پڑھیے

’کیئو کا ارب پتی شہزادہ‘: پاکستانی لڑکا جو یوکرین کا ’سٹیل کنگ‘ بنا

وہ معاملہ جس پر انڈیا اور پاکستان بظاہر ایک صفحے پر نظر آ رہے ہیں

روسی حملے کے ساتویں دن چالیس میل لمبے فوجی قافلے کی رفتار سست، حملے کی شدت میں اضافہ

یہ جذبات سے بھرپور درخواست یوکرینی خاتون نے بورس جانسن سے اس وقت کی جب وہ ذرائع ابلاغ سے بات کر رہے تھے۔

داریا کیلنیوک کا کہنا تھا کہ ’آسمان سے گرنے والے بمبوں اور میزائلوں کی وجہ سے یوکرینی خواتین اور یوکرینی بچے بہت خوف میں ہیں۔‘

لیکن یوکرین کے شہری علاقوں پر روسی حملوں اور بڑھتی ہوئی اموات کے باوجود، اس بات کے امکانات بہت کم دکھائی دیتے ہیں کہ مغربی ممالک یوکرین کی فضاؤں میں کسی قسم کی پروازوں کو روکنے کے لیے ’نو فلائی زون‘ کا اطلاق کریں گے۔

نو فلائی زون کیا ہوتا ہے؟

نو فلائی زون سے مراد یہ ہے کہ کسی خطے کی فضائی حدود کے اندر خاص قسم کے طیارے پرواز نہیں کر سکتے۔ یہ پابندی عموماً کسی ملک کے خاص مقامات کو فضائی حملوں سے محفوظ رکھنے کے لیے لگائی جاتی ہے۔

اس کے علاوہ کھیلوں کے مقابلوں اور بڑے عوامی اجتماعات کی صورت میں بھی نو فلائی زون کی پابندی عارضی طور پر لگائی جا سکتی ہے۔ اس کا بنیادی مقصد کسی خاص حدود کے اندر طیاروں کو داخلے سے روکنا ہوتا ہے، تاکہ ان مقامات کو حملوں اور دشمن کی جانب سے فضائی نگرانی سے محفوظ رکھا جا سکے۔

برطانیہ کے ایک وزیر نے خبردار کیا ہے کہ اگر نیٹو ااتحاد نے یوکرین میں نو فلائی زون کا اطلاق کیا تو اس سے ’جوہری جنگ‘ کا آغاز ہو سکتا ہے۔

اس قسم کی پابندی کا اطلاق فوجی طاقت اور ذرائع سے کیا جاتا ہے، جیسے فوجی نگرانی، فوجی تنصیبات پر ممکنہ حملے کو روکنے کے لیے دشمن کی فوج پر حملہ (پری ایمپٹِو سٹرائیک) اور ایسے طیاروں کو مار گرانا جو اس پابندی کی خلاف ورزی کرتے ہوئے نو فلائی زون میں داخل ہو جائیں۔

اگر یوکرین میں نوفلائی زون کا اطلاق کیا جاتا ہے تو اس کا مطلب یہ ہو گا کہ فوجی، خاص طور پر اگر ضروری ہوا تو نیٹو اتحاد کی فوجیں یوکرین کی فضاؤں میں اڑنے والے روسی طیاروں کو براہ راست نشانہ بنا سکیں گی۔

اگر نیٹو فورسز روسی طیاروں یا روسی جنگی آلات کے ساتھ براہ راست ٹکراتی ہیں تو اس سے لڑائی میں بہت تیزی سے اضافہ ہو سکتا ہے۔

اس حوالے سے امریکی فضائیہ کے سابق سینیئر افسر، جنرل فلپ بریڈلوو نے ایک جریدے کو بتایا تھا کہ ’آپ صرف یہ نہیں کہہ دیتے کہ فلاں علاقہ نو فلائی زون ہو گیا ہے، بلکہ آپ کو وہاں نو فلائی زون کا طاقت کے زور پر اطلاق کرنا پڑتا ہے۔‘

جنرل فلپ بریڈلوو سنہ 2013 سے 2016 تک نیٹو کے سپریم کمانڈر بھی رہے ہیں۔ ان کا مزید کہنا تھا کہ اگرچہ وہ بھی یوکرین میں نو فلائی زون کا اطلاق چاہتے ہیں لیکن یہ ایک بہت خطرناک فیصلہ ہو گا۔

روس کا یوکرین پر حملہ: ہماری کوریج

بی بی سی لائیو پیج: یوکرین پر روس کا حملہ، تازہ ترین صورتحال

روس نے یوکرین پر حملہ کیوں کیا اور صدر پوتن آخر چاہتے کیا ہیں؟

نیٹو کیا ہے اور روس کو اس پر اعتبار کیوں نہیں

ولادیمیر پوتن : سرکاری کوارٹرز میں رہنے والے سابق جاسوس صدر کیسے بنے؟

ولادیمیر زیلنسکی کا اداکاری سے یوکرین کی صدارت تک کا سفر

’کیئو کا ارب پتی شہزادہ‘: پاکستانی لڑکا جو یوکرین کا ’سٹیل کنگ‘ بنا

’یہ جنگ چھیڑنے کے مترداف ہو گا۔ اگر ہم (یوکرین کو) نو فلائی زون قرار دینے جا رہے ہیں، تو ہمیں دشمن کی صلاحیت کو ختم کرنا ہو گا کہ وہ اس علاقے میں حملہ نہ کر سکے اور ہم اپنے نو فلائی زون پر عمل کروا سکیں۔‘

برطانیہ کی پارلیمان کی دفاعی کمیٹی کے سربراہ ٹوبیئس ایلوڈ نے یوکرین میں مکمل یا جزوی نو فلائی زون کی حمایت کرتے ہوئے نیٹو اتحاد سے کہا ہے کہ وہ عام لوگوں کی اموات اور مبینہ جنگی جرائم کے تناظر میں یوکرین کی جنگ میں مداخلت کرے۔

لیکن نیٹو کے سیکریٹری جنرل نے یوکرین کی جنگ میں عملی طور پر شامل ہونے کی تجویز کو رد کرتے ہوئے پیر کو کہا تھا کہ ’ہمارا یوکرین میں داخل ہونے کا کوئی ارادہ نہیں ہے، نہ تو زمین پر اور نہ ہی فضا میں۔‘

دوسری جانب برطانیہ کے وزیرِ دفاع بین ویلس نے بھی واضح کر دیا ہے کہ برطانیہ یوکرین میں نو فلائی زون نافذ کرنے میں مدد نہیں کرے گا کیونکہ ایسا کرنے سے روسی لڑاکا طیارے پورے یورپ میں جنگ‘ چھیڑ دیں گے۔

بی بی سی سے بات کرتے ہوئے وزیر دفاع کا مزید کہنا تھا کہ ’میں کوئی یورپی جنگ نہیں چھیڑوں گا، لیکن میں یہ ضرور کروں گا کہ یوکرین کو ہر ممکن ہتھیار فراہم کروں گا کہ وہ اپنی ہر سڑک پر (روسی فوجوں) کا مقابلہ کر سکیں اور ہم یوکرینیوں کی حمایت کریں گے۔‘

امریکہ نے بھی اس قسم کی وجوہات کی بنا پر نو فلائی زون کی تجویز کو رد کر دیا ہے۔

ان خدشات کے علاوہ مغرب کو یہ خطرہ بھی ہے کہ اگر روس کےخلاف جنگ میں کسی قسم کی تیزی لائی جاتی ہے تو وہ جوہری ہتھیاروں کا استعمال کر سکتا ہے۔ یہ خوف اس وقت زیادہ نظروں میں آ گیا تھا جب گذشتہ دنوں روسی صدر ولادیمیر پوتن نے اعلان کیا تھا کہ انھوں نے روس کے جوہری دستوں کو ’خاص‘ الرٹ جاری کر دیا ہے۔

اکثر لوگوں کا خیال ہے کہ ایسا صدر پوتن نے محض دکھاوے کے لیے کیا ہے، نہ کہ وہ اصل میں اس قسم کے ہتھیار استعمال کرنے کا ارادہ رکھتے ہیں۔

یوکرین میں عام شہریوں پر خوفناک حملوں کے باوجود، وہاں میں نو فلائی زون کا امکان نہ ہونے کے برابر ہے کیونکہ عالمی جنگ کا ہلکا سا اشارہ بھی ایک جوہری جنگ میں بدل سکتا ہے۔

کبھی اس سے پہلے نو فلائی زون کا طریقہ استعمال ہوا ہے

پہلی خلیجی جنگ کے بعد سنہ 1991 میں امریکہ اور اس کے اتحادیوں نے عراق میں دو نو فلائی زون لاگو کیے تھے جن کا مقصد کچھ مخصوص مذہبی گروہوں کو حملوں سے محفوظ رکھنا تھا۔ یہ کام اقوامِ متحدہ کی منظوری کے بغیر کیا گیا تھا۔

اس کے بعد سنہ 1992 میں بلکان کی جنگ کے دوران، اقوامِ متحدہ نے ایک قرارداد منظور کی تھی جس کے تحت بوسنیا کی فضائی حدود میں بلااجازت داخل ہونے والی فوجی پروازوں پر پابندی لگا دی گئی تھی۔

اس کے علاوہ اقوامِ متحدہ کی سلامتی کونسل نے سنہ 2011 میں لیبیا میں نو فلائی زون کی منظوری دی تھی۔

بوسنیا اور لیبیا میں عائد کیے جانے والے نو فلائی زون کا اطلاق نیٹو کی افواج نے کیا تھا۔