امریکہ کے شہر نیویارک میں منگل کی صبح ایک زیر زمین ریلوے سٹیشن پر فائرنگ کے واقعہ میں تیرا افراد کے زخمی ہونے کی اطلاع ملی ہیں جن میں پانچ افراد کو گولی لگنے سے زخم آئے ہیں۔

مقامی ذرائع ابلاغ کے مطابق منگل کی صبح ساڑھے آٹھ بجے سن سیٹ پارک کے علاقے میں 36 سٹریٹ سٹیشن میں فائرنگ کا یہ واقع پیش آیا ہے۔

جائے واردات سے موصول ہونے والی تصاویر میں خون میں لت پت مسافروں کو فرش پر پڑے دیکھا جا سکتا ہے۔

اس زیرِ زمین ریلوے سٹیشن سے کچھ ایسے دھماکہ خیز آلات بھی ملے ہیں جو پھٹ نہیں سکے۔

اس حملے میں ملوث نامعلوم مسلح شخص مفرور ہے اور اسے تلاش کرنے کی کوششیں شروع کر دی گئی ہیں۔

اس نامعلوم شخص کے بارے میں بتایا جا رہا ہے کہ وہ مالٹائی رنگ کی جیکٹ پہنے ہوئے تھا اور غالبہ گیس سے بچنے کا ماسک بھی منہ پر چڑھائے ہوئے تھا۔

نیویارک کے میئر کے ترجمان ایرک اڈم نے نیو یارک کے شہریوں پر زور دیا ہے کہ وہ اس علاقے سے دور رہیں تاکہ امدادی کام کرنے والوں کو کسی دشواری کا سامنا نہ ہو۔

کم از کم چار ٹرین سروسز عارضی طور پر معطل کر دی گئی ہیں۔

نیو یارک فائر ڈپارٹمنٹ نے بی بی سی کو بتایا ہے کہ انھیں ابتدائی طور پر سٹیشن میں دھواں اٹھنے کی اطلاعات موصول ہوئیں تھیں۔لیکن جب اہلکار وہاں پہنچے تو انھیں وہاں گولی لگنے کی وجہ سے زخمی ہونے والے افراد ملے۔