نگراں وزیر ٹرانسپورٹ کے پی کی جلسے میں شرکت پر الیکشن کمیشن کا نوٹس
الیکشن کمیشن کے ضابطہ اخلاق کی خلاف ورزی کرتے ہوئے نگراں وزیر ٹرانسپورٹ خیبر پختونخوا شاہد خٹک نے نوشہرہ میں عوامی نیشنل پارٹی (اے این پی) کے جلسے میں شرکت کی، جس کی ویڈیو سوشل میڈیا پر وائرل ہوگئی۔
نگراں وزیر ٹرانسپورٹ خیبرپختونخوا شاہد خٹک نے گزشتہ رات نوشہرہ میں اے این پی کے جلسہ عام سے خطاب کیا۔ جس کی ویڈیو وائرل ہوئی ہے۔
اس حوالے سے الیکشن کمیشن نے نوٹس لے لیا ہے۔ ذرائع الیکشن کمیشن کے مطابق نگراں وزیر کسی جلسے میں شرکت نہیں کر سکتے اور نگراں وزیر کی سیاسی جلسے میں شرکت الیکشن ایکٹ 2017 کی خلاف ورزی ہے۔
اس معاملے پر نگراں وزیر ٹرانسپورٹ شاہد خٹک نے جیو نیوز سے گفتگو کرتے ہوئے کہا کہ میں نے الیکشن ایکٹ یا آئین کی خلاف ورزی نہیں کی، میں نے جلسے میں پرویز خٹک کی کرپشن کی بات کی ہے۔
دوسری جانب پاکستان تحریک انصاف (پی ٹی آئی) خیبر پختونخوا کے نائب صدر ظاہر شاہ طورو نے الیکشن کمیشن سے شاہد خٹک کی جلسے میں شرکت کا نوٹس لینے کا مطالبہ کیا اور کہا ہے کہ نگراں وزیر کی سیاسی سرگرمی الیکشن ایکٹ کی خلاف ورزی ہے۔
Comments are closed.