ناکہ بندی کے دوران پولیس افسران کو پستول ہاتھ میں نمایاں نہ رکھنے کی ہدایت

کراچی کے ضلع شرقی کے ڈپٹی انسپکٹر جنرل (ڈی آئی جی) پولیس مقدس حیدر کی جانب سے پولیس افسران کو حکم دیا گیا ہے کہ وہ اسنیپ چیکنگ یا ناکہ بندی کے دوران پستول اپنے ہاتھوں میں نمایاں نہ رکھیں۔

ایک مراسلے میں انہوں نے مشاہدہ ظاہر کیا کہ اسنیپ چیکنگ کے دوران پولیس افسران اپنے پستول ہاتھ میں نمایاں کرتے ہیں۔

ذرائع کے مطابق پولیس افسران کو شکایت کی گئی تھی کہ بعض مقامات پر پولیس افسران یا ملازمین شہریوں کو روکنے کے لیے پستول لہرا کر رُکنے کے اشارے کرتے ہیں۔

وائر لیس کے ذریعے مختلف اضلاع میں نشر کیے گئے مراسلے میں کہا گیا ہے کہ چیکنگ کے دوران پستول ہاتھ میں یا نمایاں نہیں ہونا چاہیے۔

ڈی آئی جی ایسٹ نے پولیس کنٹرول سے ہدایت کی ہے کہ پولیس افسران اپنے پستول مخصوص کور کے ساتھ بیلٹ سے لٹکا کر رکھیں۔

ایس ایس پیز کو حکم دیا گیا ہے کہ وہ اپنے اضلاع میں پولیس افسران کو چیکنگ کے ضابطہ اخلاق کا پابند بنائیں۔

واضح رہے کہ چیکنگ کے دوران اسلحہ لہرانے یا اسلحہ کی نوک پر شہریوں کو روکنے سے خوف و ہراس پھیل جاتا ہے۔

بچوں اور خاص طور پر کمزور دل حضرات پر اس کے گہرے اثرات ہوتے ہیں، پولیس رول میں بھی اس طرح کی حرکات کی سختی سے پابندی ہے۔

بشکریہ جنگ