ناظم جوکھیو قتل: چالان جمع کرانے میں تاخیر کی اصل وجہ سامنے آگئی

ناظم جوکھیو قتل کا چالان جمع کرانے میں ہوئی تاخیر کی اصل وجہ سامنے آگئی ہے۔

پراسیکیوٹر جنرل کے مطابق غیرملکی شکاریوں کے بیانات اور جام کریم کا کردار چالان میں واضح نہیں تھا، پولیس رپورٹ نامکمل تھی، دفعات غلط، قتل کہاں ہوا چالان میں نہیں بتایا گیا۔

پراسیکیوٹر جنرل سندھ کے مطابق کیس میں ایم این اے جام کریم کا کردار واضح نہیں بتایا گیا۔

پراسیکیوٹر جنرل نے اجازت کے بغیر 7 ملزمان کو چھوڑنے پر بھی اعتراض کیا اور کہا کہ تفتیش میں ان سب خامیوں کا فائدہ ملزمان کو ہوگا۔

اسکروٹنی نوٹ میں کہا گیا کہ گواہوں کے بیانات میں تضاد ہے، تفتیشی افسر ملوث گاڑی تلاش کرنے میں ناکام رہا۔

نوٹ کے مطابق تفتیشی افسر 2 ماہ میں بھی چالان پر پراسیکیوٹر جنرل کے اعتراضات دور کرنے میں ناکام رہا ہے، کیس میں کس ملزم کا کیا کردار ہے، واضح نہیں بتایا گیا۔

اسکروٹنی نوٹ میں کہا گیا کہ مقتول کی لاش کہاں سے ملی؟ قتل کہاں ہوا؟ جگہ نہیں بتائی گئی، تفتیشی افسر کو غیرملکی باشندوں کے بیانات ریکارڈ کرنا چاہیے تھے۔

نوٹ کے مطابق تفتیش کی سربراہی ایس پی یا ڈی ایس پی سے کرانے کی جوائنٹ انویسٹی گیشن ٹیم (جے آئی ٹی) کی سفارش پر عمل نہیں ہوا ہے۔

اسکروٹنی نوٹ کے مطابق جام کریم کا کردار واضح نہ ہونے سے کیس میں پراسکیوشن کی کامیابی کے امکانات کم ہیں۔

بشکریہ جنگ