نئے سیٹ اپ میں میرے وزیرِ خارجہ بننے پر فیصلہ پارٹی کریگی:بلاول بھٹو زرداری

پاکستان پیپلز پارٹی کے چیئرمین بلاول بھٹو زرداری کا کہنا ہے کہ نئے سیٹ اپ میں میرے وزیرِ خارجہ بننے پر فیصلہ پارٹی کرے گی۔

پاکستان پیپلز پارٹی کے چیئرمین بلاول بھٹو زرداری اسپیکر قومی اسمبلی اسد قیصر سے ملاقات کرنے اسپیکر چیمبر پہنچ گئے۔

اس موقع پر انہوں نے میڈیا سے گفتگو کرتے ہوئے کہا کہ عدلیہ کا فیصلہ اداروں کو غیر متنازع بنانے کی شروعات ہے، تحریکِ انصاف کے دورِ حکومت میں جمہوریت کو نقصان پہنچا۔

تحریکِ عدم اعتماد کی قرار داد قومی اسمبلی کے آج کے اجلاس کے ایجنڈے میں چوتھے نمبر پر ہے۔

بلاول بھٹو زرداری نے کہا کہ اب الیکٹرونک ووٹنگ مشین آر ٹی ایس پلس ثابت ہو گی، اوورسیز پاکستانیوں کے ووٹنگ کے حق کا مجوزہ قانون سازی میں تحفظ کریں گے۔

چیئرمین پیپلز پارٹی نے کہا کہ ایم کیو ایم سے معاہدے میں موجود مطالبات میں میری خواہشات بھی شامل ہیں، مسلم لیگ ن سے سیاسی اور نظریاتی اختلافات ہیں اور مستقبل میں بھی رہیں گے۔

انہوں نے کہا کہ میمو گیٹ کمیشن بھی جمہوریت کے خلاف سازش تھا، خط پر کمیشن کا قیام میمو گیٹ ٹو ہے جو ناکام سازش کی کوشش ہے۔

قومی اسمبلی میں قائدِ حزبِ اختلاف میاں شہباز شریف کی زیرِ صدارت اپوزیشن جماعتوں کے پارلیمانی لیڈران کا اجلاس منعقد ہوا۔

بلاول بھٹو زرداری نے مزید کہا کہ حکومت نے مراسلے کے معاملے پر وزارتِ خارجہ اور قومی سلامتی کمیٹی کو متنازع بنانے کی کوشش کی۔

پاکستان پیپلز پارٹی کے چیئرمین کا یہ بھی کہنا ہے کہ جب یوسف رضا گیلانی کو ہٹانے کے لیے فیصلہ آیا تو ہم بھی ڈپلومیٹک کیبل لہرا سکتے تھے۔

بشکریہ جنگ