میں اب بھی کرکٹ پر توجہ دے رہا ہوں، وہاب ریاض

مشیر کھیل پنجاب وہاب ریاض نے کہا ہے کہ میں اب بھی کرکٹ پر توجہ دے رہا ہوں، میں لیگز کھیلوں گا ابھی میں سری لنکا لیگ میں بھی حصہ لوں گا۔

لاہور میں پریس کانفرنس کرتے ہوئے وہاب ریاض نے کہا کہ وزیرِ اعلی پنجاب نے ہاکی کے 20 بہترین کھلاڑیوں کو ماہانہ اعزازیہ دینے کا اعلان کیا تھا۔

انہوں نے کہا کہ جن کے پاس جاب نہیں ہے ان 20 کھلاڑی ماہانہ معاوضہ دیا جائے گا، کھلاڑیوں میں نیشنل اور انٹرنیشنل کھلاڑی شامل ہیں۔

وہاب ریاض کا کہنا ہے کہ آغاز میں کھلاڑیوں کو آئندہ ماہ سے 20 ہزار روپے ماہانہ ملے گا، ابھی ہم نے آغاز کیا ہے، ماہانہ اعزازیہ میں مستقبل میں اضافہ کیا جائے گا۔

پاکستان کے فاسٹ بولر نے کہا کہ ہم 300  ایتھلیٹس کے لیے ایک پلیٹ فارم بنا رہے ہیں انہیں ہر طرح کی سہولیات ملیں گی، بجٹ میں اچھی رقم ایتھلیٹس کے لیے مختص کی جا رہی ہے۔

بنگلادیش اور سری لنکا نے پی سی بی کو نئے ہائبرڈ ماڈل کے لیے گرین سگنل دے دیا، دونوں ممالک کو پہلا راؤنڈ پاکستان میں کھیلنے پر کوئی اعتراض نہیں۔

ان کا کہنا ہے کہ چھوٹے شہروں کے کھلاڑیوں کو ٹریننگ کے اخراجات ادا کریں گے، کھلاڑیوں کا میڈیکل فری کرنے کے لیے اقدامات کر رہے ہیں۔

بھارت کے حوالے سے بات کرتے ہوئے وہاب ریاض نے کہا کہ پاکستان کرکٹ بورڈ (پی سی بی) کرکٹ کرانے کے لیے اچھا کام کیا ہے، بھارت کے ساتھ سیاسی معاملات چلتے رہے ہیں، کھیل کو سیاست سے الگ رکھنا چاہیے یہ معاملہ حکومتی سطح پر حل ہونا چاہیے۔

انہوں نے کہا کہ بھارت کو یہاں آ کر کھیلنا چاہیے، سب بڑی ٹیمیں پاکستان آ چکی ہیں، ایسا نہیں ہو سکتا کہ آپ ورلڈ کپ سے دستبردار ہو جائیں، ورلڈ کپ میں ضرور شرکت کرنی چاہیے۔

ان کا یہ بھی کہنا ہے کہ پاکستان نے جو فارمولا دیا ہے وہ اچھا ہے، کم از کم پاکستان میں میچز ہونے چاہئیں۔

بشکریہ جنگ