میرا خیال ہے گورنر کو اسمبلی اجلاس مؤخر نہ کرنے پر ہٹایا گیا، شاہد خاقان

رہنما ن لیگ شاہد خاقان عباسی کا کہنا ہے کہ میرے خیال میں گورنر کو آج پنجاب اسمبلی کا اجلاس مؤخر نہ کرنے پر ہٹایا گیا۔

پارلیمنٹ ہاؤس میں میڈیا سے گفتگو کرتے ہوئے صحافی نے رہنما ن لیگ شاہد خاقان عباسی سے سوال کیا کہ وزیراعظم نے کہا ہے ان کے خلاف سازش ہے اس لیے وہ نتائج تسلیم نہیں کریں گے، جواب میں شاہد خاقان نے کہاکہ آئین تسلیم کرائے گا، ملک کا آئین بڑا واضح ہے، جس کے خلاف تحریک عدم اعتماد کامیاب ہوتی ہے وہ گھر جاتا ہے

ذرائع کا کہنا ہے کہ گورنر پنجاب کو چوہدری پرویز الہیٰ کے کہنے پر برطرف کیا گیا ہے۔

صحافی نے ایک اور سوال کیا کہ گورنر پنجاب کو کیوں ہٹایا گیا؟ انہوں نے جواب دیا کہ میرا خیال ہے گورنر کو آج پنجاب اسمبلی کا اجلاس مؤخر نہ کرنے پر ہٹایا گیا، یہ وہاں بھی ہار رہے ہیں، بڑے شارٹ نوٹس پر اجلاس بلایا گیا ہے۔

فواد چوہدری کے مطابق نئے گورنر پنجاب کا اعلان بعد میں کیا جائے گا، آئین کے مطابق ڈپٹی اسپیکر قائم مقام گورنر ہوں گے۔

شاہد خاقان عباسی کاکہنا تھا کہ آج میڈیا کو باہر رکھا گیا ہے، یہ بات ٹھیک نہیں ہے، یہ پارلیمان ہے، یہ عوام کا فورم ہے، میڈیا کا حق ہے کہ یہ تاریخی واقعہ دیکھیں،پتہ چلے سب کو حکومت کیا کررہی ہے، اپوزیشن کیا کر رہی ہے۔

بشکریہ جنگ