منچھر جھیل میں طغیانی، علاقے میں سانپ نکل آئے

منچھر جھیل میں طغیانی کے باعث بند پر پناہ لینے والوں کی مشکلات میں اضافہ ہو گیا، طغیانی کی وجہ سے علاقے میں سانپ نکل آئے۔

ذرائع کا کہنا ہے کہ بند آر ڈی 62 پر شہری محمد قاسم ملاح کو سانپ نے کاٹ لیا، متاثرہ شخص کو علاج کے لیے 18 کلو میٹر دور سیہون لے جایا گیا۔

دوسری جانب ریسکیو ذرائع نے بتایا ہے کہ دادو میں سیلاب زدہ علاقوں میں تیز ہواؤں کے باعث بندوں میں پانی کی لہریں اٹھنے لگیں۔

ذرائع کا کہنا ہے کہ جوہی اور میہڑ کے رنگ بندوں پر پانی کی لہروں نے دباؤ بڑھا دیا ہے، جہاں پر بڑی تعداد میں شہری بھی پہنچ گئے ہیں۔

ڈپٹی کمشنر جامشورو کا کہنا ہے کہ عوام غیر ضروری طور پر منچھر جھیل کے بند پر نہ جائیں۔

ریسکیوذرائع نے بتایا ہے کہ شہریوں کی جانب سے بوریوں میں مٹی بھر کر رنگ بند کی مضبوطی کا کام جاری ہے۔

ادھر ڈپٹی کمشنر فرید الدین کا کہنا ہے کہ اس وقت منچھر جھیل پر خطرے کی صورتِ حال پیدا ہوگئی ہے، علاقہ مکین جھیل کے قریبی علاقے کو خالی کر دیں۔

انہوں نے کہا کہ آر ڈی 54 سے آر ڈی 58 تک منچھر جھیل کے بند پر دباؤ ہے، عوام غیر ضروری طور پر منچھر جھیل کے بند پر نہ جائیں۔

ان کا کہنا تھا کہ منچھر جھیل کے لیے اگلے 24 سے 48 گھنٹے اہم ہیں، آخری وقت تک کوشش کریں گے کہ جھیل کو کٹ نہ لگائیں۔

بشکریہ جنگ