ملک خوشدل کا خیبرپختونخوا حکومت کے فیصلے کے خلاف سپریم کورٹ جانے کا اعلان

سابق نگراں وزیر خیبر پختونخوا ملک خوشدل نے کہا ہے کہ وزیراعلیٰ نے مجھ سے پوچھے بغیر ڈی نوٹیفائی کردیا۔

پشاور پریس کلب میں میڈیا سے گفتگو میں ملک خوشدل نے کہا کہ حلف اٹھانے سے پہلے میں نے 25 سال سروس پر ریٹائرمنٹ لے لی تھی۔

انہوں نے کہا کہ متعلقہ حکام کو میری سروس اور حلف سے پہلے ریٹائرمنٹ لینے کا علم ہے۔

سابق نگراں وزیر نے مزید کہا کہ نائب قاصد کو بھی نکالنے کےلیے چارج شیٹ د ی جاتی ہے جبکہ وزیراعلیٰ نے مجھ سے پوچھے بغیر مجھے ڈی نوٹیفائی کردیا۔

ان کا کہنا تھا کہ حلف اٹھانے والے وزیر کو بلا وجہ ڈی نوٹیفائی کردیا گیا، خیبر پختونخوا حکومت کے اس فیصلے پر سپریم کورٹ جاؤں گا۔

ملک خوشدل نے یہ بھی کہا کہ سرکاری ملازمت سے ریٹائرمنٹ لینے کے 2 سال کا قانون مجھ پر لاگو نہیں ہوتا۔

انہوں نے کہا کہ دو سال تک قانون کے مطابق سیاست میں نہیں آسکتا، ہائی کورٹ کے فیصلے کو بھی چیلنج کروں گا۔

سابق وزیر خیبر پختونخوا نے کہا کہ مختلف پارٹیوں سے شمولیت کی کالز آرہی ہیں۔

بشکریہ جنگ