ملتان، فیصل آباد میں دولہے شیروانی پہنے ووٹ ڈالنے آگئے

شادی کا دن انسان کی زندگی میں یادگار تصور کیا جاتا ہے، اس دن کو مزید یادگار بنانے کے لیے ملتان اور فیصل آباد کے دولہے اپنا ووٹ کاسٹ کرنے پولنگ اسٹیشن پہنچ گئے۔

فیصل آباد میں این اے 108 کے ضمنی الیکشن میں پولنگ اسٹیشن نمبر 17 میں دولہا یونس مسیح اپنا ووٹ کاسٹ کرنے پہنچ گیا۔

کرسچین ٹاؤن میں دولہے نے بارات لے جانے سے پہلے اپنا ووٹ کاسٹ کیا اور پھر دلہن کو لینے چلا گیا۔

دوسری طرف این اے 157 ملتان کے انتخابات میں بھی دولہا ووٹ ڈالنے پہنچا۔

شیروانی پہنے ماجد خان بارات کے ہمراہ ووٹ کاسٹ کرنے پہنچا، جس کا کہنا تھا کہ پہلے ووٹ کاسٹ کریں گے اور پھر دلہنیا لینے جائیں گے۔

بشکریہ جنگ