معین خان نے ٹیم پاکستان کی بڑی غلطی کی نشاندہی کردی

پاکستان کرکٹ ٹیم کے سابق کپتان اور وکٹ کیپر بیٹر معین خان نے ٹی 20 ورلڈ کپ کے ہائی وولٹیج میچ میں ٹیم پاکستان سے ہونے والی بڑی غلطی کی نشاندہی کردی۔

جیو نیوز کے پروگرام نیا پاکستان میں گفتگو کے دوران معین خان نے کہا کہ آج ٹی20 کرکٹ کا بہترین میچ ہوا، پریشر دونوں ٹیموں پر تھا۔

انہوں نے کہا کہ آصف علی کو پکے نمبر پر کھلانا چاہیے، پاکستان کو 18واں اوور شاہین کے بدلے حارث رؤف یا محمد نواز سے کروانا چاہیے تھا۔

معین خان نے مشورہ دیا کہ اگلے میچ میں ٹیم پاکستان کو ایک تبدیلی کرنا پڑے گی، شاہین کی فارم نظر نہیں آرہی، ان کی جگہ محمد وسیم کو کھلانا چاہیے۔

سابق کپتان نے مزید کہا کہ انٹرنیشنل کرکٹ کونسل (آئی سی سی) رولز کے مطابق فیلڈ امپائر نو بال پر تھرڈ امپائر کے فیصلے کا انتظار کرتا ہے۔

ان کا کہنا تھا کہ آئی سی سی رولز کے مطابق بولڈ ہونے پر رنز بناسکتے ہیں، شاید ویرات کوہلی اس کو جانتے تھے اس لیے اس سے فائدہ اٹھایا۔

بشکریہ جنگ