مظفرگڑھ ضمنی الیکشن میں دلچسپ صورتحال، ایک خاندان کے 4 امیدوار مدمقابل

مظفرگڑھ میں پنجاب اسمبلی کی 2 نشستوں پر ویسے تو 27 امیدواروں نے کاغذات نامزدگی جمع کرائے ہیں تاہم ایک حلقے میں ایک ہی خاندان کے 4 امیدوار سامنے آگئے جس کے بعد یہاں دلچسپ صورتحال پیدا ہوگئی۔

پی پی 272 پر 2 بھائیوں نے ایک دوسرے خلاف کاغذات نامزدگی جمع کروائے تو ان کی بیگمات بھی ان کے خلاف مدمقابل آگئیں۔

ملک میں اگر آج ہی عام انتخابات ہوجائیں تو کس پارٹی کو کتنے فیصد ووٹ ملنے کا امکان ہے؟

گزشتہ انتخابات میں پی پی 272 میں ہی زہرہ بتول نے اپنے سگے بیٹے کو شکست دی تھی۔

مظفر گڑھ کے 2 صوبائی حلقوں پی پی 272 اور پی پی 273 پر 17 جولائی کو ضمنی انتخابات ہو رہے ہیں۔

ڈسٹرکٹ الیکشن کمشنر طیب زوار بخاری کے مطابق پی پی 272 پر ایک ہی خاندان کے 4 افراد نے بھی کاغذات نامزدگی جمع کروائے ہیں۔

2 سیاسی حریف بھائیوں پی ٹی آئی کے ایم این اے باسط سلطان بخاری اور ہارون سلطان نے نہ صرف اپنے کاغذات جمع کروائے بلکہ ان کی بیگمات کے کاغذات نامزدگی بھی جمع کروائے گئے ہیں۔

دونوں بھائیوں کی والدہ زہرہ بتول گزشتہ الیکشن میں اپنے سگے بیٹے ہارون سلطان کو شکست دیکر تحریک انصاف کی ایم پی اے منتخب ہوئی تھیں۔

پی پی 272 سے زہرہ بتول کو منحرف ہونے پر ڈی سیٹ کیا گیا تھا، اسی حلقے سے سابق وزیر مملکت سردار معظم جتوئی نے بھی کاغذات نامزدگی جمع کروائے ہیں۔

بشکریہ جنگ