مسلم لیگ ن کی نائب صدر مریم نواز لندن پہنچ گئیں

پاکستان مسلم لیگ (ن)  کی نائب صدر مریم نواز  لندن پہنچ گئیں، جنید صفدر اور ان کی اہلیہ عائشہ بھی مریم کے ہمراہ ہیں۔

شریف فیملی کے افراد مریم نواز کو لینے کیلئے ائیرپورٹ پہنچ گئے، مریم نواز پاکستانی وقت کے مطابق تقریباً ساڑھے گیارہ بجے ایون فیلڈ پہنچیں گی۔

مریم نواز اپنی بیمار والدہ کو چھوڑ کر 4 برس قبل نواز شریف کے ہمراہ پاکستان گئیں تھیں، مریم نواز کی نواز شریف سے ملاقات کو بھی تقریباً تین برس ہو چکے ہیں۔

پاکستان سے روانگی سے قبل مریم نواز نے کہا تھا کہ وہ نواز شریف سے ملنے کیلئے بے چین ہیں۔

اس سے قبل لیگی کارکنان مریم نواز کے استقبال کیلئے نواز شریف کے گھر پہنچے اور سابق وزیراعظم سے ملاقات بھی کی۔

نواز شریف سے مکالمہ کرتے ہوئے کارکنوں کا کہنا تھا کہ ہم ایون فیلڈ ہاؤس کے باہر مریم نواز کا استقبال کریں گے۔

اس موقع پر سابق وزیراعظم نواز شریف  کا کہنا تھا کہ تمام کارکنوں کا مشکور ہوں جو مریم کا استقبال کرنے کے لیے آئے ہیں۔

بشکریہ جنگ