مریم نواز نے ’ووٹ کو عزت دو ‘ کے بعد نیا نعرہ متعارف کروا دیا

پاکستان مسلم لیگ ن کی نائب صدر مریم نواز شریف نے جماعت کے لیے نیا نعرہ متعارف کروا دیا ہے۔

گزشتہ دنوں مریم نواز شریف نے سوشل میڈیا ایپ انسٹا گرام پر مسلم لیگ ن کی ٹیم کی میزبانی میں براہِ راست عوام سے بات چیت کی۔

اس دوران مریم نواز شریف نے موجودہ ملکی سیاسی حالات، معیشت اور مستقبل پر بات کی۔

مسلم لیگ ن کی نائب صدر مریم نواز نے کہا کہ ہمارے پاس مشکلات کا حل ہے، ہم کرسکتے ہیں اور کریں گے، ان شاء اللّٰہ۔

مریم نواز شریف نے اپنی تقریر کے دوران مسلم لیگ ن کی جماعت کے لیے ’ووٹ کو عزت دو‘ کے بعد نیا نعرہ متعارف کروایا۔

مریم نواز شریف کا کہنا تھا کہ ماضی میں بھی مسلم لیگ ن نے پاکستانیوں کو مشکلات سے نکالا اور اب بھی مسلم لیگ ن کی قیادت ہی پاکستان کو درپیش مشکل حالات سے باہر نکالے گی۔

اُنہوں نے اپنی تقریر میں نیا نعرہ بلند کرتے ہوئے عوام سے کہا کہ ’ہمارا ساتھ دینا، ہم اللّٰہ کے فضل سے کر چکے، کر کے دکھایا ہے اور کر کے دکھائیں گے۔‘

مریم نواز نے نیا نعرہ ’کر کے دکھایا ہے، کر کے دکھائیں گے‘ متعدد بار دُہرایا اور اپنی انسٹا گرام ٹیم سے بھی یہی نعرہ دہرانے کا کہا۔

مریم نواز شریف کے اس نئے نعرے کو سوشل میڈیا پر خوب پذیرائی مل رہی ہے۔

مریم نواز کی جانب سے یہ نیا نعرہ بعد ازاں اپنی دیگر ٹوئٹس میں بھی استعمال کیا گیا۔

بشکریہ جنگ