مردہ حالت میں جناح اسپتال لائی گئی لڑکی کا پوسٹ مارٹم کرلیا گیا

کراچی کے جناح اسپتال میں لائی گئی خاتون کا پوسٹ مارٹم مکمل کرلیا گیا، فوری طور پر خاتون کی وجہ موت کا تعین نہیں ہوسکا۔

پولیس سرجن ڈاکٹر سمعیہ نے میڈیا کو بتایا کہ ظاہری طور پر خاتون کے جسم پر تشدد کا کوئی نشان نہیں ہے۔

اسپتال حکام کا کہنا تھا کہ لڑکی کی شناخت کر لی گئی، اس کی عمر 18 سال ہے، لڑکی کو مردہ حالت میں اسپتال لایا گیا تھا، ابتدائی معلومات کے مطابق لڑکی کا تعلق لاہور سے ہے۔

یاد رہے کہ کراچی کے جناح اسپتال میں کار سوار افراد مبینہ طور پر لڑکی کی لاش چھوڑ کر فرار ہوگئے تھے۔ اس حوالے سے پولیس کا کہنا تھا کہ کار سوار افراد ابتدائی تفصیلات دینے کے بعد لڑکی کی لاش چھوڑ کر اسپتال سے فرار ہوئے۔

پولیس حکام کا کہنا تھا کہ اسپتال حکام کے بیان کے مطابق گاڑی میں ایک لڑکا اور ایک لڑکی سوار تھے، لاش کی شناخت کر لی گئی ہے، لڑکی کو ڈیفنس سے لایا گیا تھا، واقعے کی مزید تفصیلات حاصل کی جا رہی ہیں، جس گاڑی میں لڑکی کو اسپتال منتقل کیا گیا اس کی تفصیلات لی جا رہی ہیں۔

اس حوالے سے سینئر سپرنٹنڈنٹ پولیس (ایس ایس پی) ساؤتھ اسد رضا کا کہنا تھا کہ لڑکی کو صبح ساڑھے 7 بجے مردہ حالت میں اسپتال لایا گیا۔

اسد رضا کا کہنا تھا کہ ابتدائی معلومات کے مطابق نشے کی زیادتی موت کی وجہ بنی، اسپتال انتظامیہ سے تفصیلات حاصل کر لی گئی ہیں۔

بشکریہ جنگ