محمد رضوان گراؤنڈ میں سب کو خوش رکھتے ہیں، خوشدل شاہ
ایچ بی ایل پاکستان سپر لیگ ( پی ایس ایل) کی ٹیم ملتان سلطانز کے کرکٹر خوشدل شاہ کا کہنا ہے کہ کپتان محمد رضوان گراؤنڈ میں سب کو خوش رکھتے ہیں اور نرم لہجے میں سب کو سمجھاتے ہیں۔
جیو نیوز سے گفتگو کرتے ہوئے خوشدل شاہ نے بولنگ میں اعتماد دینے کا کریڈٹ محمد رضوان کو دیتے ہوئے کہا کہ پی ایس ایل میں میری بولنگ اچھی جا رہی ہے، محمد رضوان نے پی ایس ایل سے پہلے بنگلہ دیش میں کہا تھا کہ اوورز کے لئے تیار رہنا ہے، بولنگ کرتے رہا کرو اس سے فائدہ ہو گا۔
انہوں نے کہا کہ میں کیرئیر کے آغاز سے ہی بیٹنگ کے ساتھ بولنگ کر رہا ہوں، میری ہمیشہ کوشش ہوتی ہے کہ میری بولنگ میں زیادہ سے زیادہ بہتری آئے، میری بولنگ جتنی بہتر ہوگی کیرئیر میں مزید بہتری آئے گی۔
ان کا مزید کہنا تھا کہ میں نیٹ پر زیادہ بولنگ کرنے کی کوشش کرتا ہوں، جب بیٹنگ سے فری ہوجاتا ہوں تو دوسرے بیٹسمینوں کو الگ نیٹ پر بولنگ کرتا ہوں۔
خوشدل شاہ نے بتایا کہ ملتان سلطانز کی گزشتہ برس سے اچھی کارکردگی کی وجہ ٹیم کا یونٹ بن کر کھیلنا ہے، ٹیم آنرز اور مینجمنٹ نے ہمیشہ اعتماد دیا ہے، مینجمنٹ کھلاڑیوں کو پرسکون رکھتی ہے، ٹیم میں ہر کوئی پازیٹو رہتا ہے اور ایک دوسرے کو سپورٹ کرتا ہے۔
ملتان سلطانز کے کھلاڑی کا یہ بھی کہنا تھا کہ لاہور اور کراچی میں میچز کا فرق نظر نہیں آیا بس کمبی نیشن ہونا چاہیے ہر کوئی اچھا کرنے کی کوشش کر رہا ہے، کراچی میں بھی ٹیموں نے اچھے رنز کئے ہیں، جبکہ موسم کا تھوڑا فرق ہے اوس بھی زیادہ نہیں پڑ رہی۔
خوشدل شاہ ٹم ڈیوڈ کے معترف ہیں اور کہتے ہیں کہ ٹم ڈیوڈ بہت اچھا کھیل رہے ہیں، میرے نزدیک چار نمبر پر ان سے اچھا بیٹسمین کوئی اور نہیں ہے۔
Comments are closed.