محمد حفیظ پاکستان ٹیم کیلئے مزید کھیلنا چاہتے تھے، شاہد آفریدی

پاکستان کرکٹ ٹیم کے سابق کپتان شاہد خان آفریدی نے ساتھی کھلاڑی محمد حفیظ کی ریٹائرمنٹ پر کہا ہے کہ حفیظ پاکستان کے لیے مزید کھیلنا چاہتے تھے۔ 

خیال رہے کہ اسٹار آل راؤنڈر محمد حفیظ نے تمام طرز کی کرکٹ سے ریٹائرمنٹ لے لی ہے۔ 

قومی کرکٹ ٹیم کے کپتان بابراعظم نے آج انٹرنیشنل کرکٹ سے ریٹائرمنٹ لینے والے محمد حفیظ کو زبردست خراج تحسین پیش کیا ہے۔

ان سے متعلق شاہد آفریدی نے ایک ٹیلی ویژن پروگرام میں شرکت کے دوران کہا کہ میں ان کا بیان سن رہا تھا، ان کے رویے سے واضح تھا کہ وہ جلد ریٹائرمنٹ لینے کے بجائے پاکستان کرکٹ ٹیم کے لیے مزید کھیلنا چاہتے تھے۔ 

شاہد آفریدی نے کہا ہے کہ میں ہمیشہ پاکستان کرکٹ بورڈ (پی سی بی) اور کھلاڑیوں کے درمیان رابطے میں فرق پر بات کرتا ہوں اور مجھے لگتا ہے کہ بالکل ایسا ہی محمد حفیظ کے ساتھ ہوا ہے البتہ مجھے خوشی ہے کہ محمد حفیظ نے اپنی ریٹائرمنٹ کے معاملے کو کسی بڑے تنازع میں تبدیل نہیں کیا۔ 

سابق کپتان کا کہنا تھا کہ میں حفیظ کا کرکٹ کیریئر بہت شاندار تھا اور اس نے مجھے میچ گر پرفارمنسز بھی دیں، میں انہیں، ان کے اہلِ خانہ اور والدین کو مبارکباد بھی دیتا ہوں 

واضح رہے کہ محمد حفیظ نے 392 بین الاقوامی میچز میں قومی ٹیم کی نمائندگی کرتے ہوئے 12 ہزار 780 رنز بنائے اور 253 وکٹیں بھی حاصل کی جبکہ وہ ٹیم کے لیے 32 مرتبہ مین آف دی میچ بھی رہے۔

بشکریہ جنگ