ماضی میں ثقلین مشتاق داماد شاداب خان کے بارے میں کیا کہتے رہے؟

قومی ٹیم کے آل راؤنڈر شاداب خان  ثقلین مشتاق کے داماد بن گئے، اس حوالے سے وہ کہتے ہیں کہ ثقلین مشتاق سے ابھی سسر والا سین نہیں ہے۔ کوچ والا ہی تعلق ہے، وہ ڈانٹے رہتے ہیں، میں انہیں ثقی بھائی ہی کہوں گا۔

 شاداب خان کی شادی کے بعد سوشل میڈیا پر انہیں اور ان کے سسر مایہ ناز کرکٹر ثقلین مشتاق کو مداحوں کی جانب مبارک باد دی جا رہی ہے، اس کے ساتھ ہی شاداب کی شادی کے تناظر میں ثقلین مشتاق کی ماضی کی ایک دلچسپ ویڈیو بھی شیئر کی جا رہی ہے جس میں وہ شاداب کی پرفارمنس کی تعریفوں کے پل باندھ رہے ہیں۔

آل راؤنڈر شاداب خان کی شادی میں قومی کرکٹرز کا ’روٹی گروپ‘ سب کی توجہ کا مرکز بنا رہا۔

ویڈیو میں شاداب خان کے سسر ثقلین مشتاق شاداب کی جارحانہ بیٹنگ کی تعریفیں کرتے ہوئے کہتے ہیں کہ  شاداب دنیا کے بہترین آل راؤنڈرز میں شامل ہو سکتا ہے، تھوڑا سا اپنی لائف میں ڈسیپلین لائے، تیکنک کے لحاظ سے تھوڑا سا خود کو مزید پولش کر لے۔

ثقلین مشتاق کا اپنے داماد کے بارے میں مزید کہنا تھا کہ قومی ٹیم کا نائب کپتان رہتے ہوئے اچھا کھیلے گا تو کبھی مختصر عرصے کیلئے کپتانی کرنے کا بھی موقع مل جائے گا تو وہ اچھے طریقے سے کپتانی بھی کر پائے گا، مگر یہ بات تو طے ہے کہ اگر اس کو ذمہ داری دی جائے تو ذمہ داری سے اس کی کرکٹ میں مزید نکھار آجاتا ہے۔

ویڈیو میں انہوں نے مزید کہا کہ  میری دعا ہے کہ اللہ تعالیٰ اس کو بہت عزت دے اور پاکستان کا نام روشن کرے۔

بشکریہ جنگ