ماحول سازگار ہے، عوام باہر نکلیں، ووٹ ڈالیں: الیکشن کمشنر سندھ

الیکشن کمشنر سندھ اعجاز انور چوہان نے عوام سے اپیل کی ہے کہ آج کراچی کے قومی اسمبلی کے حلقے این اے 245 میں ماحول سازگار ہے، عوام باہر نکلیں اور اپنا حقِ رائے دہی استعمال کریں۔

الیکشن کمشنر سندھ اعجاز انور چوہان نے میڈیا سے گفتگو کے دوران کہا ہے کہ کسی نے قانون کی خلاف ورزی کی تو اس سے سختی سے نمٹا جائے گا۔

ان کا یہ بھی کہنا ہےکہ الیکشن کمیشن کا عملہ بروقت تمام پولنگ اسٹیشنز پر موجود تھا، ڈی آر او اور ان کی ٹیم بھی متحرک ہے۔

الیکشن کمشنر سندھ اعجاز چوہان نے پی ای سی ایچ ایس بلاک 2 کے مختلف پولنگ اسٹیشنز کا دورہ بھی کیا۔

اس موقع پر چیف سیکریٹری سہیل راجپوت اور آئی جی سندھ غلام نبی میمن بھی الیکشن کمشنر سندھ کے ساتھ تھے۔

وہاں میڈیا سے گفتگو کرتے ہوئے الیکشن کمشنرسندھ اعجاز انور چوہان نے کہا کہ سیکیورٹی کے خاطر خواہ انتظامات ہیں، سیاسی جماعتوں کی جانب سے لگائے جانے والے الزامات بے بنیاد ہیں، آئی جی سندھ غلام نبی میمن نے بہت اچھا انتظام کیا ہے۔

انہوں نے یہ بھی کہا کہ کسی نے بھی اس پُرامن طریقہ کارکو خراب کرنے کی کوشش کی تو اس کے خلاف سخت ایکشن لیا جائے گا، کے الیکٹرک سے کہا ہے کہ آج کسی پولنگ اسٹیشن پر لوڈشیڈنگ نہ کریں۔

میڈیا سے گفتگو کرتے ہوئے چیف سیکریٹری سندھ سہیل راجپوت کا کہنا ہے کہ این اے 245 کے آج کے ضمنی انتخابا ت میں ابھی ووٹرز ٹرن آؤٹ کم ہے۔

انہوں نے یہ بھی کہا ہے کہ حیدرآباد میں بے تحاشہ بارش ہوئی ہے، 23 سے 25 اگست کو بارش کے ایک اور اسپیل کا امکان ہے، بلدیاتی انتخابات 28 اگست کو ہیں۔

آ ئی جی سندھ غلام بنی میمن نے میڈیا سے گفتگو کرتے ہوئے کہا کہ اسلحے پر پابندی ہے، کوئی اسلحے کے ساتھ حلقے میں نہیں آ سکتا۔

کراچی کے قومی اسمبلی کے حلقے این اے 245 میں ضمنی الیکشن کے لیے پولنگ جاری ہے، جہاں 15 امیدوار مدِ مقابل ہیں۔

صبح 8 بجے شروع ہونے والی پولنگ کسی وقفے کے بغیر شام 5 بجے تک جاری رہے گی۔

یہ نشست پی ٹی آئی کے ڈاکٹر عامر لیاقت کے انتقال سے خالی ہوئی تھی۔

حلقہ این اے 245 کے ضمنی انتخاب میں ایم کیو ایم پاکستان کے معید انور اور پی ٹی آئی کے امیدوار محمود مولوی کے درمیان کانٹے کے مقابلے کی توقع ہے۔

پیپلز پارٹی اور جمعیت علمائے اسلام کے امیدوار ایم کیو ایم پاکستان کے امیدوار کے حق میں دست بردار ہو چکے ہیں۔

اس حلقے میں ڈاکٹر فاروق ستار آزاد امیدوار کے طور پر مقابلے میں موجود ہیں۔

تحریکِ لبیک کے محمد احمد رضا، پاک سر زمین پارٹی کے سید حفیظ الدین اور مہاجر قومی موومنٹ کے محمد شاہد بھی امیدوار ہیں۔

پی ای سی ایچ ایس، طارق روڈ، پی آئی بی کالونی، لائنز ایریا اور دیگر علاقوں کے لوگ آج اپنے نمائندے کا انتخاب کریں گے۔

بشکریہ جنگ