لنگر خانوں کے سوا عمران خان کا ایک منصوبہ دکھادیں، مفتاح اسماعیل کا چیلنج
سابق وزیر خزانہ اور مسلم لیگ (ن) کے سینئر رہنما مفتاح اسماعیل نے چیلنج کیا ہے کہ لنگر خانوں کے سوا عمران خان کا ایک منصوبہ دکھادیں۔
جیو نیوز کے پروگرام آج شاہزیب خانزادہ کے ساتھ میں گفتگو کے دوران مفتاح اسماعیل نے کہاکہ ملتان سکھر موٹروے بھی مسلم لیگ ن نے شروع کیا، یہ کہتے ہیں سکھر موٹر وے پی ٹی آئی کا منصوبہ ہے۔
انہوں نے طنزیہ انداز میں کہا کہ ایسے تو پی ٹی آئی والے یہ بھی کہہ دیں گے کہ قرارداد پاکستان بھی عمران خان نے پیش کی تھی۔
سابق وزیرخزانہ نے مزید کہا کہ لنگر خانوں کے علاوہ عمران خان کا ایک منصوبہ دکھادیں، کے سی آر کے پیسے بھی نواز شریف نے دیے تھے۔
مفتاح اسماعیل نے یہ بھی کہا کہ ہم نے کے سی آر میں اپنے حصے کے 12 ارب روپے دے دیے تھے، ہم نے کراچی اور حب میں پاور پلانٹ لگائے۔
اُن کا کہنا تھا کہ صرف جھوٹ بولنے کے علاوہ انہوں نے کچھ نہیں کیا، تین سال سے سن رہے ہیں گیس پائپ لائن بچھےگی، ٹرمینل لگیں گے۔
ن لیگ کے سینئر رہنما نے کہا کہ کراچی کے ماسٹر پلان میں پانج لائنیں ہیں، پی ٹی آئی کوئی ایک لائن شروع کرسکی ہے تو بتائے۔
انہوں نے کہا کہ سندھ حکومت نے 2017 اور 2018 میں بسوں کا ٹینڈر کیا تھا، گرین لائن میں 2018 کے بعد کوئی کام نہیں ہوا۔
مفتاح اسماعیل نے کہا کہ گرین لائن منصوبے میں پی ٹی آئی نے ٹکٹنگ سسٹم کے علاوہ کوئی کام نہیں کیا، یہ سسٹم بھی دو ماہ میں بن جاتا ہے اور ان کو 3 سال لگ گئے۔
اُن کا کہنا تھا کہ ٹکٹنگ سسٹم پہلے ہی لاہور میٹرو اور اسلام آباد میٹرو میں چل رہا ہے، ایک ٹکٹنگ سسٹم میں انہیں ساڑھے 3 سال لگے۔
Comments are closed.