لاہور میں چکی کا آٹا ڈیڑھ سو روپے کلو ہو گیا

لاہور میں 15 کلو آٹے کا تھیلا ڈیڑھ سو روپے مہنگا ہو گیا، ایک کلو چکی کا آٹا ڈیڑھ سو روپے کلو تک جا پہنچا۔

پنجاب کے دارالخلافہ میں 2 ہفتوں کے دوران 15 کلو کے تھیلے کی قیمت 300 روپے بڑھ چکی ہے۔

گندم کی قلت بھی برقرار ہے، سستے آٹے کے حصول کے لیے ملک کے مختلف شہروں میں عوام رُل گئے۔

قومی اسمبلی کی قائمہ کمیٹی برائے غذائی تحفظ میں وفاقی وزیر نیشنل فوڈ سیکیورٹی طارق بشیر چیمہ نے کہا کہ آٹے اور گندم کا وفاقی حکومت سے کوئی لینا دینا نہیں۔

حیدر آباد میں غیر معیاری سستا آٹا بھی غریبوں کو بھلا معلوم ہونے لگا۔

میر پور خاص میں لوگوں کو قطار میں لگنے کے باوجود آٹا نہ ملنے کی شکایت سامنے آئی ہے۔

سرگودھا میں سستا آٹا ہوٹلوں کو دیے جانے کی شکایات بڑھ گئیں۔

بشکریہ جنگ