لاہور، PSL میچز میں اوس کا کردار اہم ہوگا

پاکستان سپر لیگ کا دوسرا مرحلہ کل سے قذافی اسٹیڈیم میں شروع ہو گا، لاہور کے میچز میں ’’اوس‘‘ کا کردار اہم ہوگا۔

پاکستان سپر لیگ کے دوسرے مرحلے کے میچز 10 سے 27 فروری تک لاہور میں کھیلے جائیں گے ، یہ وہ موسم ہے جب اوس بہت گرتی ہے ۔

پی ایس ایل کے دوسرے مرحلے کے لیے تمام ٹیمیں لاہور پہنچ گئی ہیں، ٹیموں کی آمد کی وجہ سے لاہور کی مختلف شاہراہوں پر بدترین ٹریفک جام رہا۔

قذافی اسٹیڈیم میں میچز کا آغاز ساڑھے 7بجے ہو گا اور یہی وقت ہے جب کھلے میدان میں اوس گرنا شروع ہو جاتی ہے ، اوس کا لاہور میں ہونے والے میچز میں اہم کردار ہو گا، ٹیمیں چاہیں گی کہ ٹاس جیت کر پہلے بولنگ کریں کیونکہ بعد میں بو لنگ کرتے ہوئے گیند گیلی ہونے کی وجہ سے بال گرپ کرنے میں مشکل ہو سکتی ہے ۔

گزشتہ شب جب ٹیموں نے قذافی اسٹیڈیم اور ایل سی سی اے گراؤنڈ میں پریکٹس کی تو اوس گرنے کی وجہ سے انہیں مشکلات کا سامنا کرنا پڑا اور انہوں نے اوس سے نمٹنے کے لیے خاص پریکٹس کی ۔

واضح رہے کہ پی ایس ایل 7 کے سلسلے میں لاہور میں تین ڈبل ہیڈرز ہوں گے ، پہلا میچ ڈھائی بجے شروع ہوگا۔

بشکریہ جنگ