لاپتا آبدوز کے 5 مسافروں کو بچانے کیلئے وقت کم، 20 گھنٹے کی آکسیجن باقی

بحر اوقیانوس میں لاپتا آبدوز میں سوار 5 افراد کو بچانے کیلئے وقت کم رہ گیا، آبدوز میں موجود افراد کے پاس 20 گھنٹے کی آکسیجن باقی ہے۔

سرچ آپریشن میں شریک کینیڈین مشن کو آبدوز کے لاپتا ہونے کے مقام سے آواز کے سگنلز مل گئے۔

ہر 30  منٹ بعد سنائی دینے والی آوازیں کس چیز کی ہیں؟ اب تک تعین نہیں کیا جاسکا۔

امریکی کوسٹ گارڈ کا کہنا ہے کہ ریموٹ کنٹرول آلات سے آوازوں کے مقام کا تعین کیا جا رہا ہے۔

امریکی بحری جہاز ’ہورائزن آرکٹک‘ بھی آج رات تک ریسکیو مشن میں شریک ہو جائے گا۔

بحر اوقیانوس میں سیاحوں کی لاپتا ہونے والی آبدوز کا معاملہ اب سنگین صورت اختیار کرنے لگا ہے۔

ریسکیو مشینری امریکی کارگو طیاروں کے ذریعے کینیڈا کے ایئرپورٹ پہنچا دی گئی ہے۔

لاپتا آبدوز میں معروف پاکستانی کاروباری شخصیت شہزادہ داؤد اور ان کے بیٹے سلیمان داؤد سمیت 5 افراد سوار ہیں۔

برطانوی اخبار میں انکشاف کیا گیا ہے کہ لاپتا آبدوز ٹائٹن کو آزاد انسپکٹرز سے چیک نہیں کرایا گیا تھا۔

لاپتا آبدوز کی کمزور سیفٹی پر ماضی میں خدشات کا اظہار کیا گیا تھا، میرین ٹیکنالوجسٹ سوسائٹی نے ٹائٹن کے بارے میں خدشات ظاہر کیے تھے۔

کمپنی کے چیف ایگزیکٹو آفیسر (سی ای او) کو متنبہ کیا گیا تھا کہ’ٹائٹن‘ سانحے سے دوچار ہوسکتا ہے۔

بشکریہ جنگ