لارڈز میں پہلی افطار پارٹی کے انعقاد کی وجہ کیا تھی؟

انگلینڈ اور ویلز کرکٹ بورڈ کی میزبانی میں ہوم آف کرکٹ لارڈز میں پہلی مرتبہ افطار پارٹی کا اہتمام رواں ماہ کیا گیا جس میں کئی اعلیٰ شخصیات نے شرکت کی۔

یارکشائر کرکٹ کلب میں عظیم رفیق کے ساتھ ہونے والے نسل پرستی کے اسکینڈل کے بعد انگلینڈ کرکٹ بورڈ نے مثبت ثقافت کو فروغ دینے کے لیے ایک اہم اقدام کیا ۔

اس تقریب میں عظیم رفیق کی موجودگی کے علاوہ جارج ڈوبیل جیسی مشہور شخصیات نے بھی شرکت کی جس نے اس تقریب کو چار چاند لگادیے۔

قومی کرکٹر شعیب ملک نے اس اقدام کی تعریف کی اور لکھا کہ  لارڈز میں ایک تاریخی لمحہ، ان تمام لوگوں کے لیے خصوصی تعریف جنہوں نے رمضان المبارک کے دوران لارڈز میں افطاری کی۔

حاضرین نے انگلینڈ کرکٹ بورڈ (ای سی بی) اور لارڈز کرکٹ اسٹیڈیم کی انتظامیہ کی جانب سے مسلم کمیونٹی کو متحد کرنے اور بین الاقوامی سطح ہر ایک مثبت چہرہ دکھانے پر ان کی تعریف بھی کی۔

اسکائی اسپورٹس کے ایسوسی ایٹ پروڈیوسر نکول پانڈے نے لارڈز کے میدان میں لانگ روم سے مغرب کی اذان کی ویڈیو بھی شیئر کی اور اسے خوبصورت لمحہ قرار دیا۔

علاوہ ازیں افطار پارٹی میں انگلینڈ کے سابق کپتان نے بھی شرکت کی اور اس طرح کے اقدام کو خوب سراہا۔

انہوں نے کہا کہ ہوم آف کرکٹ پر رمضان کریم کی پہلی افطاری کی میزبانی میں ایک خوشگوار شام گزری۔

بشکریہ جنگ