قومی، صوبائی اسمبلی الیکشن سے قبل ہمیں ورکرز، ووٹرز کو متحرک کرنا ہے، شاہد خاقان

سابق وزیراعظم اور مسلم لیگ (ن) کے سینئر رہنما شاہد خاقان عباسی نے کہا ہے کہ قومی اور صوبائی اسمبلی کے الیکشن سے قبل ہمیں متحد ہونا ہے اور مایوس بھائیوں کو ساتھ لے کر چلنا ہے۔

مسلم لیگ (ن) کی سینئر نائب صدر اور چیف آرگنائزر مریم نواز نے راولپنڈی جلسے کے دوران سابق وزیراعظم شاہد خاقان عباسی کو اپنی نشست پر بٹھادیا۔

راولپنڈی میں ورکرز کنونشن سے خطاب میں شاہد خاقان عباسی نے کہا کہ قومی اور صوبائی اسمبلی کے الیکشن سے قبل ہمیں ورکرز اور ووٹرز کو متحرک کرنا ہے۔

انہوں نے کہا کہ صوبائی اسمبلی اور قومی اسمبلی کے الیکشن نزدیک ہیں، ن لیگ انتخابات میں کامیاب ہوگی۔

شاہد خاقان عباسی نے مزید کہا کہ جن حالات میں مسلم لیگ (ن) حکومت میں آئی آپ کا باخبر ہونا ضروری ہے۔

مسلم لیگ (ن) کی سینئر نائب صدر اور چیف آرگنائزر مریم نواز نے کہا ہے کہ عدلیہ میں کچھ فیض کے چیلے موجود ہیں، جو اب تک کام کر رہے ہیں۔

ان کا کہنا تھا کہ ورکرز کنونشن میں ہم سب یہاں اکٹھے ہیں، مسلم لیگ (ن) ملک کو استحکام دینے کی کوشش کر رہی ہے۔

ن لیگی رہنما نے یہ بھی کہا کہ راولپنڈی سے ہمیشہ مسلم لیگ (ن) کامیاب ہوئی ہے۔

انہوں نے کہا کہ تہیہ کرنا ہے کہ پوری محنت کرنی ہے، حلقوں میں صحیح امیدوار دینے ہیں، یہاں وہ لوگ آئے ہیں جو اگلے الیکشن میں ن لیگ کو کامیاب کریں گے۔

بشکریہ جنگ