فٹبال ورلڈکپ میچ کے دوران دل کا دورہ پڑنے سے امریکی صحافی کا انتقال

امریکا کے نامور کھیلوں کے صحافی گرانٹ وال قطر میں ارجنٹینا اور نیدرلینڈز کے فٹبال میچ کے دوران اسٹیڈیم میں ہی انتقال کرگئے۔

میڈیا رپورٹس کے مطابق وال اسٹیڈیم کے پریس باکس میں تھے جب ورلڈکپ کوارٹر فائنل میں اضافی وقت کے دوران اچانک گر گئے۔

طبی عملے نے انہیں سی پی آر دیا لیکن وہ جانبر نہ ہوسکے، وال اسٹریٹ جرنل کی رپورٹ میں کہا گیا ہے کہ انہیں دل کا دورہ پڑا تھا۔

گرانٹ وال کی اہلیہ ڈاکٹر سیلین گونڈر وبائی امراض کی ماہر ہیں اور انہوں نے صدر جو بائیڈن کی کورونا وائرس ٹاسک فورس میں بھی کام کیا ہے۔

امریکی ساکر ایسوسی ایشن نے ٹوئٹ کرتے ہوئے گرانٹ وال کی خدمات کو خراج عقیدت پیش کیا۔

ایسوسی ایشن نے اپنے بیان میں کہا کہ ہمیں بہت دکھ ہے کہ گرانٹ وال اب نہیں رہے، امریکا میں فٹبال کے فروغ کے لیے گرانٹ نے بہت اہم کردار ادا کیا۔

آنجہانی گرانٹ وال فٹبال رپورٹنگ کے حوالے سے شہرت رکھتے تھے، قطر فیفا ورلڈکپ ان کا آٹھواں ورلڈکپ تھا۔

انہوں نے سابق برطانوی فٹبال کپتان ڈیوڈ بیکہم پر کتاب لکھی جو سب سے زیادہ فروخت ہونے والی کتابوں میں شامل ہے۔

امریکی محکمہ خارجہ کے ترجمان نیڈ پرائس نے ٹوئٹ کرتے ہوئے کہا کہ ہم گرانٹ وال کی موت پر بے حد افسردہ ہیں اور ان کے اہلخانہ سے تعزیت کرتے ہیں۔

امریکی عہدیدار نے مزید کہا کہ ہم سینئر قطری حکام سے رابطے میں ہیں تاکہ گرانٹ وال کے اہلخانہ کی خواہشات ہر ممکن حد تک پوری کی جاسکیں۔ 

بشکریہ جنگ