فوکنر کے معاملے پر پاکستان کو بہت سخت ہونا چاہیے، انضمام الحق

سابق کپتان قومی کرکٹ ٹیم انضمام الحق نے کہا ہے کہ جیمز فوکنر کے معاملے پر پاکستان کو بہت سخت ہونا چاہیے۔

جیمز فوکنر کے معاملے پر تبصرہ کرتے ہوئے انضمام الحق کا کہنا تھا کہ یہ چیزیں ملک کی عزت کے لیے بہت ضروری ہیں۔

انہوں نے یہ بھی کہا کہ کوئی بھی کھلاڑی اس طرح کی بدتمیزی کرے تو ایکشن ہونا چاہیے۔

پی سی بی اور کوئٹہ گلیڈی ایٹرز کی جانب سے مشترکہ اعلامیہ جاری کیا گیا ہے جس میں کہا گیا ہے کہ جیمز فوکنر کو آئندہ پی ایس ایل میں نہ کھلانے پر پی سی بی اور فرنچائز میں اتفاق ہوا ہے۔

ماضی کی مثال دیتے ہوئے سابق کپتان کا کہنا تھا کہ ویسٹ انڈیز میں باب وولمر کا معاملہ ہوا تھا، اس وقت باب وولمر پاکستان کے کوچ تھے، اُس وقت ہمارے خلاف پوری تفتیش کی گئی تھی۔

واضح رہے کہ کوئٹہ گلیڈی ایٹرز سے کھیلنے والے آسٹریلوی کھلاڑی جیمز فوکنر نے پی ایس ایل سیون سے دستبرداری کا اعلان کیا تھا۔

انہوں نے اپنے بیان میں کہا تھا کہ پی ایس ایل میں پی سی بی نے میرے معاہدے اور معاوضے کی پاسداری نہیں کی۔

پاکستان کرکٹ بورڈ (پی سی بی) نے پاکستان سپر لیگ (پی ایس ایل) میں کوئٹہ گلیڈی ایٹرز کی نمائندگی کرنے والے آسٹریلوی کرکٹر جیمز فولکنر سے متعلق ردعمل دیا ہے۔

بعدازاں آسٹریلوی کھلاڑی کے جھوٹے اور گمراہ کن الزامات کا پی سی بی کی جانب نوٹس لیا گیا۔

ذرائع نے بتایا تھا کہ جیمز فولکنر کے ہوٹل سے چیک آؤٹ کے وقت پی سی بی کو اس کا ازالہ کرنا پڑا جبکہ آسٹریلوی کرکٹر نے امیگریشن حکام سے بھی بدتمیزی کی۔

پی سی بی اور کوئٹہ گلیڈی ایٹرز نے مشترکہ بیان جاری کرتے کہا کہ جیمز فوکنر کو آئندہ پی ایس ایل میں نہیں کھلایا جائے گا۔

بشکریہ جنگ