فواد چوہدری کی چند روز میں جھوٹ بولنے کی ہیٹ ٹرک

پاکستان تحریک انصاف (پی ٹی آئی) کے رہنما فواد چوہدری نے چند روز میں جھوٹ بولنے کی ہیٹ ٹرک مکمل کرلی۔

فواد چوہدری نے الزام لگایا کہ شرح سود میں اضافہ موجودہ حکومت نے کیا اور جیو نیوز اس کا الزام پچھلی حکومت پر لگا رہا ہے۔

 جیو نیوز نے تو صرف ایف پی سی سی آئی کے صدر کا بیان چلایا تھا کہ شرح سود میں اضافہ پچھلی حکومت نے کیا، اسٹیٹ بینک نے خود شرحِ سود بڑھانے کا اعلان 7 اپریل کو کیا جب ملک پر عمران خان ہی کی حکومت تھی۔

فواد چوہدری اس سے پہلے ٹیپو سلطان کو شیرِ بنگال قرار دے چکے، جب کہ ٹیپو سلطان کا بنگال سے کوئی تعلق نہیں تھا، شیرِ بنگال تو قرارداد پاکستان پیش کرنے والے مولوی اے کے فضل الحق کا لقب تھا۔

پی ٹی آئی رہنما سی این این کی خبر شیئر کرکے یہ بھی الزام لگا چکے ہیں کہ موجودہ حکومت امریکا کو فضائی حدود استعمال کرنے کی اجازت دینے والی ہے۔

انہوں نے خبر پر تاریخ تک نہیں پڑھی کہ یہ خبر 23 اکتوبر 2021 کی ہے، جب عمران خان کی حکومت تھی، امریکا سے ایسا کوئی معاہدہ ہونے والا تھا تو عمران خان کے اپنے دور میں ہونے والا تھا۔

بشکریہ جنگ