فواد عالم کا قومی ٹیم کیلئے نیک تمناؤں کا اظہار

ٹیسٹ کرکٹر فواد عالم نے ٹی ٹوئنٹی ورلڈکپ 2021 میں ناقابلِ شکست رہنے والی قومی کرکٹ ٹیم کے لیے نیک تمناؤں کا اظہار کیا ہے۔

فواد عالم نے اپنے ٹوئٹر پیغام میں قومی کرکٹ ٹیم کے کھلاڑیوں کے لیے کہا کہ سپر 12 مرحلے میں آپ کے گروپ کا آج آخری میچ ہے، اسے بھی آسانی کے ساتھ کھیلتے ہوئے گروپ میں ٹاپ پوزیشن پر اپنی حیثیت کو برقرار رکھیں۔

واضح رہے کہ ٹی ٹوئنٹی ورلڈکپ کے سپر 12 مرحلے میں گروپ 2 کی ٹاپ ٹیم پاکستان آج اپنا آخری راؤنڈ میچ اسکاٹ لینڈ کے ساتھ کھیلے گی۔

اپنی پہلی پوزیشن برقرار رکھنے کے لیے گرین شرٹس کو آج جیت درکار ہے۔

آصف علی کا کہنا ہے کہ ٹیم کی کارکردگی اچھی ہے، ورلڈ کپ جیتنا چاہتے ہیں تاکہ لوگوں کو اور خوشیاں دیں۔

آئی سی سی ٹی ٹوئنٹی ورلڈ کپ کے ہونے والے میچ میں پاکستان ٹیم میں اسکاٹ لینڈ کے خلاف بھی کسی تبدیلی کا امکان نہیں ہے۔

ذرائع کے مطابق ٹیم مینجمنٹ مسلسل پانچویں میچ میں وننگ کمبینیشن کو ہی برقرار رکھنے کی خواہشمند ہے۔

پلیئنگ الیون کا حتمی فیصلہ ٹاس کے وقت کیا جائے گا جبکہ پاکستان کامیابی کی صورت میں آسٹریلیا سے سیمی فائنل میں مد مقابل ہوگا۔

بشکریہ جنگ